निगू तिहाईपाखें संविधान जारी यायेगु जुइ : खनाल
येँ/ नेकपा एमालेया वरिष्ठ नेता लिसे पूर्वप्रधानमन्त्री झलनाथ खनालं सहमति जुइमफुगु अवस्थाय् निगू तिहाई बहुमतपाखें संविधान जारी यायेमाःगु धयादीगु दु । खनालं संविधानया विवादित विषयसं सहमति मजूसा प्रक्रियाय् वनेगु धयादिसें तर सहमति जुइ हे मफुगु अवस्थाय् निगू तिहाई थ्यंकाः संविधान जारी यायेगु धयादिल ।
युवा संघ नेपालया थौं न्हापांगु विस्तारित बैठकय् न्ववानादिसें नेता खनालं एमाओवादीं संविधान दयेके मास्तेमवःपिंलिसे गठबन्धन याःगुप्रति च्यूताः प्वंकादीगु दु । गठबन्धन त्वःताः कांग्रेस एमालेलिसे सहकार्य यायेत इनाप यानादिसें वय्कलं मधेशवादी दलतय्सं नं संविधान निर्माणया नितिं सकारात्मक भूमिका निर्बाह यायेगु विश्वास प्वंकादिल ।
कांग्रेस व एमालेदथुइया स्वापू संविधान जारी जुइधुंकाः हिउपाः वइगु धयादिसें खनालं धयादी, ‘संविधान जारी जुइधुंकाः कांग्रेसलिसेया स्वापू ब्यागलं जुइ, तर एकता व सहकार्य धाःसा दयाच्वनी ।’
