नेताया हुनिं राष्ट्रिय भावना कमजोर : तुलाधर
येँ/ मानव अधिकारवादी लिसे नागरिक न्ह्यलुवाः पद्मरत्न तुलाधरं नेताया हुनिं राष्ट्रिय भावना कमजोर जूगु धयादीगु दु । सत्ता सञ्चालनय् थ्यंपिं नेतातय्सं नेपाःमि जनतायात स्वयाः नं विदेशी शक्तिइ विश्वास यानाच्वंगु हुनिं नेपाली राष्ट्रियता कमजोर जूगु तुलाधरं धयादिल ।
सम्वाद डबलीइ थौं ग्वसाः ग्वःगु संघीय पहिचानया पक्षय् दुगु थीथी प्यंगू मञ्चया गठबन्धन घोषणा ज्याझ्वलय् वय्कलं उगु खँ कनादीगु खः । ज्याझ्वलय् मूपाहाँकथं झायादीम्ह तुलाधरं राजनीतिक आन्दोलनय् फुक्क आदिवासी, जनजातिया अधिकार सुनिश्चित जुइगु जूसां नं व्यवहारय् लागू मजूगु धयादीगु दु । वय्कलं छु नं आमुख मनूया इच्छा स्वयाः नं फुक्क जनताया अधिकार सुरक्षित जुइकथं संविधान च्वयेमाःगु धयादीगु दु । वय्कलं धयादी ‘न्हापा जुजुतय्सं थें हे नेतां बकस याःगु संविधान स्वीकार याःसा सुयागु नं अधिकार सुरक्षित जुइमखु ।’ वय्कलं सीमाया नितिं हि हायेकेगु भाषण याइपिं नेतात राष्ट्रियतादथुइ हमला जुलं नं टुलुटुलु स्वयाच्वंगु दाबी यानादिल ।
ज्याझ्वलय् डा. कृष्ण भट्टचनं फुक्क जाति, जातिया संविधान मच्वइगु ग्याःचिकु अप्वयाः वंगु धयादिसें फुक्कसित खबरदारी यायेत इनाप यानादिल । ‘आः दयेकीगु संविधानं फुक्क जातजातियात समान अधिकारया ग्यारेण्टी मयाःसा संविधान स्वीकार जुइमखु’ भट्टचनं धयादिल ।
संघीय मगराँच मञ्चया कजि लिसे पहिचानवादीतय्गु गठबन्धनया कजि जनक मगरं राष्ट्रिय पहिचान जुइत दकले न्हापां थःगु वा जातीय पहिचान दयेमाःगु धयादिल । ‘झीसं फुक्क जाति व समुदायया पहिचान स्वीकार यायेत तयार दु, अथेहे झीगु नं स्वीकार यायेमाः’ मगरं धयादिल ।
संघीय मगराँग मञ्च, संघीय तमुवान मञ्च, संघीय खसराङ मञ्च व संघीय लोकतान्त्रिक दलित मञ्च छधी जुयाः दयेकूगु थ्व गठबन्धनं संविधानसभादुने व पिने दुगु फुक्क जाति, वर्ग, समुदायलिसे छधी जुयाः संविधानय् अधिकार सुरक्षित यायेत आन्दोलनया ज्याझ्वः यायेगु धयादीगु दु ।
