कार्यतालिकाय् हिउपाः वइमखु : गृहमन्त्री गौतम
मकवानपुर/ उपप्रधानमन्त्री वामदेव गौतमं संविधान निर्माणया कार्यतालिकाय् हिउपाः मजुइगु धयादीगु दु । थौंनिसें मकवानपुरया पालुङय् न्ह्याःगु झिन्हुया थाहा महोत्सवया उलेज्या यानादिसें मन्त्री गौतमं दलतय्सं वइगु माघ ८ गतेदुने संविधान जारी यायेगु अठोट यायेधुंकूगुलिं उकिइ हिउपाः मजुइगु नापं स्पष्ट यानादिल ।
वय्कलं धयादी, ‘संविधान इलय् तयार जुइ, अनंलिपा देय् आर्थिक समृद्धिया दिशापाखे उन्मुख जुइ, जिं सकसित ढुक्क जुइत इनाप यानाच्वना ।’ गौतमं थाहा नगरपालिका व जिल्लाया उत्तरी भेगया जनतातय्त सहज सेवा बीत इलाकास्तरया एकीकृत सेवा पलिस्था यायेगु विश्वास बियादीगु दु ।
ज्याझ्वलय् एमाओवादीया न्वकु नारायणकाजी श्रेष्ठं राष्ट्रिय सहमतिया हे आधारय् संविधान जारी यायेत बहः नापं बियादीगु दु ।
‘सहमति यायेमफुगु हे हुनिं न्हापाया संविधानसभा अथेंहे विघटन जुल’ वय्कलं धयादी, ‘छगू पक्षीय रूपं संविधान जारी यायेगु कुतः ताःलाइ मखु ।’
