अनिश्चितकालया नितिं स्थगित बैठक न्हय्वाःलिपा थौं च्वनीगु
येँ/ वंगु असार १६ गते अनिश्चितकालया नितिं स्थगित जूगु बैठक थौं च्वनीगु जूगु दु । थ्यंमथ्यं ७० दिं अर्थात् न्हय्वाःलिपा संविधानसभाया बैठक थौं सनिलया न्याताः इलय् सःतूगु खः ।
अनिश्चितकालया नितिं बैठक स्थगित जूसां नं थुकिया दथुइ धाःसा संविधानसभाअन्तर्गतया थीथी समितितय्सं ज्या यानाच्वंगु खः । संवैधानिक राजनीतिक संवाद लिसे सहमति समितिं विवाद ज्यंकेमफयेवं तत्काल संविधानसभाया बैठक च्वनेमाःगु आवश्यकता खनेदुगु खः ।
कार्यव्यवस्था परामर्श समितिया म्हिगः च्वंगु बैठकं थौं सनिलया न्याताः इलय् सःतेगु निर्णय याःगु खःसा सभामुख सुवासचन्द्र नेम्वाङं म्हिगः व्यवस्थापिका संसद्या बैठकय् उगु जानकारी याकूगु खः ।
बैठकय् राजनीतिक समितिया सभापति डा.बाबुराम भट्टराईं सहमति व असहमतिया प्रतिवेदन न्ह्यःब्वयेगु ज्याझ्वः दु । संविधानसभां सहमति जूगु विषययात मस्यौदा समितिइ छ्वयेगु ज्या जुइसा विवादित विषययाबारे धाःसा सहलहलिपा हाकनं राजनीतिक समितिइ सहमतिया नितिं छ्वयेगु तयारी जुइ ।
