सर्वपक्षिय सभाय् दलत वंसा थःगु पार्टी सरकारय् वनेत तयार : वैद्य
डडेल्धुरा/ नेकपा–माओवादीया नायः मोहन वैद्यं सर्वपक्षिय राजनैतिक सभाय् दलत वंसा थःगु पार्टी सरकारय् वनेत तयार दुगु धयादीगु दु । डडेल्धुराय् थौं क्रान्तिकारी पत्रकार महासंघपाखें ग्वसाः ग्वःगु पत्रकार सम्मेलनय् वय्कलं सर्वपक्षिय राजनैतिक सभाय् दलत वंसा थःगु पार्टी सरकारय् वनेत तयार दुगु धयादीगु खः ।
पत्रकार सम्मेलनय् वय्कलं थः लगायत एकीकृत नेकपा माओवादीयात नापं पिने घ्वाना प्रतिगमनया प्रक्रिया छ्यलाः सत्तारुढ दलतय्सं संविधान जारी यायेत स्वयाच्वंगु द्वपं नापं बियादीगु दु । माओवादीयात पिने तयाः छु नं हालतय् जनताया संविधान दयेके मफइगु वय्कलं दाबी नापं यानादीगु दु ।
वय्कलं नेपालय् अझ नं राजनीतिक क्रान्ति जुइमफुगुलिं आर्थिक क्रान्ति न्ह्यःने न्ह्यायेमफुगु धयादीगु दु । मेमेगु पार्टीइ पदया ल्वापु जुयाच्वंगु अवस्थाय् माओवादीदुने क्रान्तिया ल्वापु जुयाच्वंगुलिं तज्याइगु स्वभाविक जूगु वय्कःया धापू दु ।
