आदिवासी जनजाति महासंघपाखें आन्दोलनया घोषणा

येँ/ संविधानसभाय् प्रतिनिधित्वया माग यानाः नेपाल आदिवासी जनजाति महासंघं आन्दोलनया घोषणा याःगु दु । थौं येँय् ग्वसाः ग्वःगु छगू ज्याझ्वलय् महासंघं निलात्या ताःहाकःगु आन्दोलनया याझ्वः घोषणा याःगु खः ।

घोषित आन्दोलनया ज्याझ्वलय् असोज १ गतेनिसें ३ गतेतक्क संविधानसभा भवन बानेश्वरय् धर्ना बीगु, जिल्लाय् धाःसा प्रमुख जिल्ला अधिकारीपाखें ज्ञापनपौ लःल्हाना धर्ना बीगु, कार्तिक १५ गतेतक्क आदिवासी जनजाति आन्दोलनया नितिं देय्व्यापी जागरण अभियान न्ह्याकेगु, कार्तिक १६ गतेनिसें मंसिर १५ गतेतक्क लिम्बुवान, तमुवान, किराँत, ताम्सालिङ, नेवाः, मगरात, थरुहट वल्लो किराँत व कोचिलालगायतया प्रान्तय् प्रान्तीय आमसभा यायेगु ज्याझ्वः धलः दयेकूगु दु ।

महासंघं धर्मनिरपेक्षता, गणतन्त्र, संघीयता व पूर्ण समानुपातिक प्रतिनिधित्वयात संविधानय् अपरिवर्तनीय धाराया रूपय् सुनिश्चित यायेमाःगु माग नापं याःगु दु । अथेहे, आदिवासी जनजातिलिसे जूगु सम्झौता कार्यान्वयन यायेमाःगु, न्यूनतम छगू जाति छम्ह प्रतिनिधित्वया व्यवस्था यायेमाःगु लगायतया माग नं उमिसं न्ह्यःने तःगु दु ।

उगु अवधिदुने नं थःपिनिगु माग सुनुवाई मयाःसा मंसिर १६ गते निक्वःगु चरणया थप तच्वःगु आन्दोलनया ज्याझ्वः घोषणा यायेगु महासंघया नायः नरेन्द्रकुमार कुमालं ख्याच्वः ब्यूगु दु । महासंघं नीखुम्ह मनोनयन संविधान अःखः याःगुप्रति च्यूताः प्वंकुसें थ्वहे प्रक्रियापाखें संविधान जारी याःसा थःपिन्त स्वीकार्य मजुइगु नापं न्ह्यःथंगु दु ।