मेपिनिगु खँ न्यना ब्यागलं जुल, आः छधी जुइ : प्रचण्ड
येँ/ एकीकृत नेकपा माओवादीया नायः लिसे पुलांम्ह प्रधानमन्त्री पुष्पकमल दाहाल प्रचण्डं पार्टी एकताया विकल्प मदुगु धयादीगु दु । बासु स्मृति दिवसया लसताय् ग्वसाः ग्वःगु छगू ज्याझ्वलय् न्ववानादिसें वय्कलं वैचारिक संघर्ष जुल धायेवं पार्टी तछ्यायेमज्यूगु धयादीगु दु ।
‘पार्टीदुने थीथी संघर्ष जुइ, संघर्ष जुल धायेवं पार्टी तछ्यायेमखु, प्रचण्डं धयादी,’ ‘जिपिं ब्यागलं जुल धाःसा आः गबलें छ्यं ल्ह्वने फइमखु’, न्हापा मेपिनिगु खँ अप्वः न्यना पार्टी स्यंगु नं प्रचण्डं स्वीकार यानादिल । ‘मेपिनिगु खँ जक अप्वः न्यना जि व बाबुरामजु ब्यागलं जूगु हे खः । आः उकिपाखें पाठ सयेकाः उकियात भिंकाः न्ह्यःने न्ह्यायेमाः’, वय्कलं धयादिल ।
नापनापं वय्कलं कांग्रेस–एमाले झिंनिगू बुँदे सम्झौता अःखः वनेत स्वःगु द्वपं ब्यूगु दु । ‘जिपिं झिंनिगू बुँदे स्वयां पिने वनाः संघर्ष यायेमखु तर कांग्रेस, एमाले झिंनिगू बुँदे सम्झौता त्वःताः वनेत स्वयाच्वंगु दु । अज्याःगु ज्या जिमिगुपाखें गबलें याकेबीमखु ।’
