एमाओवादी आन्दोलनया रणनीतिइ
येँ/ सहमति स्वयां प्रक्रियापाखें हे न्ह्यःने न्ह्यायेगु नेपाली कांग्रेस व एमालें अडान तयेवं एकीकृत नेकपा माओवादी आन्दोलनया गृहकार्यसं न्ह्यज्याःगु दु ।
प्रक्रियाय् वनेबलय् थः अल्पमतय् लाइगु जुइवं एमाओवादीया शीर्ष नेता व मधेशवादी दलदथुइ आन्दोलनया रूपरेखाया खाका तयार यायेगु ज्याय् वंगु खः ।
कांग्रेस व एमालें सहमति यायेत कुतः याःगु थेंज्याःगु जक रणनीति न्ह्यःने न्ह्याकेवं उकियात प्रतिवाद यायेगु नितिं संसद् अवरुद्धनिसें कयाः सतक क्वाःकेगुतक्कया ज्याझ्वः घोषणा यायेत्यंगु न्ह्यःथंगु दु ।
थःपिंसं न्ह्यःने न्ह्याकाःगु उच्चस्तरीय राजनीतिक समिति व सहमति प्रणालीयात कांग्रेस–एमालें स्वीकार मयाःगु न्ह्यःथना एमाओवादी व मधेशवादी दलं सशक्त प्रतिवाद मयाःसा पार्टी व आन्दोलनया अस्तित्व हे खतराय् लाइगु लिच्वः पिकाःगु दु ।
प्रचण्ड निवास लाजिम्पाटय् च्वंगु अनौपचारिक बैठकं सहमतीय प्रणालीपाखें हे न्ह्यःने वनेगु नितिं कांग्रेस, एमालेयात दवाब बीगु नितिं नं आन्दोलनया आवश्यकता जूगु लिच्वः पिकाःगु श्रोतं न्ह्यःथंगु दु ।
