भाद्र २१ निसें २७ गतेतक्क ‘नेवाः संकिपा नखः’
येँ/ मच्छिन्द्र क्लबया ग्वसालय् थुगुसी नं नेपालभाषा लिसे संस्कृतिया संरक्षण यायेगु मू उद्देश्यं थ्वहे वइगु भाद्र २१ गतेनिसें २७ गतेतक्क स्वक्वःगु ‘नेवाः संकिपाः नखः’ याइगु जूगु दु ।
क्लबपाखें ग्वसाः ग्वःगु पत्रकार सम्मेलनय् नायः जिवेन्द्रलाल कर्माचार्यं बियादीगु जानकारीकथं प्रविधिया विकास लिसलिसे प्राचीन दबू प्याखँ लोप जुजुं वनाच्वंगुलिं आःया अवस्थाय् नेवाः म्हसीका, संस्कृति लिसे नखःचखःयात कःघानाः दयेकातःगु चीहाकःगु लिसे वृत्तचित्र महोत्सवय् न्ह्यःब्वयेत्यनागु जानकारी बियादिल ।
जनबहाःसं जुइगु उगु महोत्सवय् झिंन्हय्गू (१७) चीहाकःगु लिसे स्वंगू वृत्तचित्रया धेंधेंबल्लाः जुइगु नापं जानकारी बियादीगु दु । क्यनेगु ई धाःसा न्हापा थें हे थुगुसी नं बहनिसिया न्ह्यताः इलंनिसें झिताः ईतक्क (७–१०) खुल्ला रूपं डबुलिइ हे क्यनेगु ज्या जुइगु धयादिल ।
नेवाः संस्कृतिलिसे सम्बन्धित जीवन शैली, मिसा सशक्तिकरण, बालश्रम उन्मुलन, मस्तय्गु मनोविज्ञानयात सकारात्मक प्रभाव लाकेगुकथं मनोरञ्जनात्मक लिसे सामाजिक विषयवस्तुइ आधारित संकिपा व वृत्तचित्र क्यनेगु ज्या जुइ ।
महोत्सवया कजि भाजु पवित्र कसाःजुं धयादी – नेवाः भाय्, संस्कृति लिसे परम्परा हे नेवाः समुदायया म्हसीका खः व थुकियात संरक्षण यानाः प्रबद्र्धन यायेगु नितिं महोत्सव छगू धिसिलाःगु माध्यम जुइगु बिचाः प्वंकादीगु दु । महोत्सवया नितिं थ्यंमथ्यं प्यंगू लख तका खर्च तुइगु ग्वसाः खलकं धुकुमाः याःगु दु ।
