भ्रष्टाचार अन्त्यया नितिं स्थानीय निकायया निर्वाचन आवश्यक : मन्त्री ज्ञवाली
येँ/ ऊर्जामन्त्री राधा ज्ञवालीं भ्रष्टाचार अन्त्यया नितिं स्थानीय निकायया निर्वाचन गुलिफु उलि याकनं यायेमाःगु धयादीगु दु ।
सञ्चारिका समूहं थौं ग्वसाः ग्वःगु ‘स्थानीय निकायया निर्वाचन व मिसाया ब्वति’ विषयक छगू अन्तरक्रिया ज्याझ्वलय् न्ववानादिसें वय्कलं झिंन्ह्यदँनिसे निर्वाचन जुइमफया स्थानीय निकायसं भ्रष्टाचार अप्वयाः वनाच्वंगु बिचाः प्वंकादीगु दु । मन्त्री ज्ञवालीं स्थानीय निकायया निर्वाचन जुइमफया विकासय् पंगः जुइगुया नापनापं मिसा हिंसाया घटना म्हो जुइमफुगु खँय् दुःख तायेकादीगु दु ।
राज्यया विकास प्रक्रियाय् मिसा मिजं नापनापं यंकेत समानुपातिक, समावेशी व अर्थपूर्ण रूपं ब्वति कायेमाःगु खँय् बहः बियादिसें वय्कलं स्थानीय निकायया निर्वाचनय् न्ययेगू प्रतिशत मिसा सुनिश्चित यायेत फुक्क दलया ध्यान वनेमाःगु बिचाः तयादीगु दु ।
नेकपा एमालेया युवा नेतृ शान्ति अधिकारीं थःगु पार्टीं चुनावी घोषणापत्रय् हे स्थानीय निकायया निर्वाचनय् न्ययेगू प्रतिशत मिसातय्त ब्वति कायेकेगु धकाः न्ह्यःथनातःगु खँ तयादिसे मेमेगु पार्टीं नं थुकियात लागू याकेतगु नितिं न्ह्यःज्यायेमाःगु बिचाः प्वंकादीगु खः ।
