आः भ्रष्टाचारी जनताया न्ह्यःने वनेमदइगु
येँ/ न्हूगु संविधानय् भ्रष्टाचारीं निर्वाचनय् ब्वति कयाः जनताया न्ह्यःने वनेमदइगु जूगु दु । डा. बाबुराम भट्टराई नेतृत्वया संवैधानिक, राजनीतिक संवाद लिसे सहमति समितिया थौं च्वंगु बैठकं भ्रष्टाचारीयात आजीवन चुनाव ल्वायेमदइगु विषयसं सहमति कायम याःगु खः ।
अन्तरिम संविधानय् अदालतपाखें भ्रष्टाचार द्वपं प्रमाणित जूम्ह मनुखं खुदँतक्क उम्मेदवार जुइमदइगु प्रावधान दु । बैठकलिपा समितिया सभापति भट्टराईं धयादी, ‘भ्रष्टाचारीयात आजीवन उम्मेदवार जुइगुपाखें प्रतिबन्ध तयेत सहमति जूगु दु ।’ आः दयेकीगु न्हूगु संविधानय् भ्रष्टाचारलगायत नैतिक पतन जुइगु लिसे गम्भीर द्वपं प्रमाणित जूपिंसं आजीवन उम्मेदवार जुइमदइगु व्यवस्था यायेत प्रमुख दलत सहमत जूगु खः ।
अथेहे, बैठकं गम्भीर द्वपं लाःपिं उच्चपदस्थ पदाधिकारीतय्त क्वये व च्वयेया सदनया निगू तिहाई बहुमतं महाद्वपं बियाः चीकेफइगु व्यवस्था यायेगु विषयसं सहमति चूलाकूगु दु ।
राष्ट्रपति, उपराष्ट्रपति, प्रधानन्यायाधीश, न्यायाधीशलगायत संवैधानिक निकायया पदाधिकारी महाद्वपं बियाः चीकेधुंकाः छु नं सार्वजनिक पदय् च्वनेमदइगु प्रावधान तयेत नं सहमति चूलाःगु सभापति भट्टराईं जानकारी बियादिल । हलिमया थीथी देशय् उगु विषयसं ब्यागलं ब्यागलं अभ्यास जुइगु यानाच्वंगु दु ।
