सत्तारुढ दल व निगू माओवादीदथुइया बैठक क्वचाल

वैद्य माओवादीया च्यागू बुँदे मागय् मेमेगु दल सकारात्मक

येँ/ सरकारय् दुगु प्यंगू दल व एमाओवादी व नेकपा–माओवादीदथुइया बैठक क्वचाःगु दु । बैठकय् संविधानसभापिने दुगु मोहन वैद्य नेतृत्वया नेकपा–माओवादीं सरकारदथुइ च्यागू बुँदे माग न्ह्यःब्वःगु दु ।

प्रधानमन्त्री निवास बालुवाटारय् जूगु बैठकय् नेकपा–माओवादीं संविधानया ल्यं दुगु विवादित विषयसं सहमति चूलाकेत सर्वपक्षीय भेला यायेमाःगु लगायतया माग तःगु दु । मागबारे थौं सहलह जूसां नं छु नं निर्णय जुइमफुगु नेतातय्सं धाःगु दु ।

नेकपा–माओवादीं तःगु मागबारे मू स्वंगू दलं आन्तरिक सहलह याना कंस हाकनं च्वनीगु बैठकपाखें ठोस निर्णय याइगु न्ह्यःथंगु दु । थौंया सहलहसं नेपाली कांग्रेस, नेकपा एमाले, एकीकृत माओवादी, नेकपा–माओवादी, राप्रपा व नेकपा मालेया शीर्ष नेतातय्गु ब्वति दुगु खः ।