संविधानया नामय् सहमति चूलात
येँ/ संविधानसभाया विवादित विषय क्वछीगु भालाः दुगु राजनीतिक संवाद तथा सहमति समितिं भावी संविधानया नामय् सहमति चूलाकूगु दु । थौं सिंहदरबारय् च्वंगु संवैधानिक राजनीतिक संवाद एवं सहमति समितिया बैठकं भावी संविधानया नां ‘नेपालको संविधान’ जक तयेगु सहमति चूलाकूगु खः ।
थ्व स्वयाः न्ह्यः चीधंगु दलं संविधानया नां हिउपाःयात आत्मसाथ यायेगु मजूगु न्ह्यःथना संघीय लोकतान्त्रिक संविधान धकाः तयेमाःगु अडान तःगु खः । थौंया बैठकय् धाःसा चीधंगु दलया नेतातय्सं नं संविधानया प्रस्तावित नामय् सहमति क्यंगु बैठकलिपा नेतातय्सं जानकारी ब्यूगु खः । बैठकं न्हूगु संविधान जारी जुइधुंकाः नं आःया राष्ट्रिय म्येँ व निशानी छाप कायम हे तयेगु सहमति नापं जूगु दु ।
बैठकं संवैधानिक परिषद् न्याम्ह दुजः दुगु दयेकेगुलिइ नं सहमति क्यंगु दु । संवैधानिक परिषद्य् प्रधानमन्त्री, प्रमुख विपक्षी दलया नेता, सभामुख, प्रधानन्यायधीश व विशिष्ट योगदान याःम्ह छम्ह मिसा च्वनीगु कथं सहमति चूलाःगु खः ।
समितिं राजदूत नियुक्ति समावेशीया आधारय् यायेगुलिइ नं सहमति चूलाकूगु दु । बैठकं न्हूगु संविधान जारी जुइधुंकाः न्हूगु निर्वाचन मजूत्तले संसद् खालि मजुइगु विषयसं नं सहमति चूलाकूगु दु । निर्वाचन जुया संसद्या न्हापांगु बैठक मजूत्तले आःया हे संसद्यात कायम तयेगुकथं समितिइ सहमति चूलाःगु खः । संविधानसभाया कार्यतालिकाकथं संवाद समितिं भदौ २१ गतेदुने फुक्क विवादित विषयसं सहमति चूलाकेमाः ।
दलतय्सं क्वःछ्यूगु इलय् सहमति यायेमफुसा प्रक्रियाय् यंकेमाःगु कानुनी प्रावधान दु । संविधानया मुख्य विवादित विषय राज्यया पुनर्संरचना, शासकीय स्वरूप, न्याय प्रणालीया विषयसं दलतदथुइ ब्यागलं ब्यागलं मत दु ।
