एमाओवादीपाखें थौं नं संसद् बैठक अवरुद्ध

येँ/ एकीकृत नेकपा माओवादीं थौं नं संसद् बैठक अवरुद्ध याःगु दु । थ्व स्वयाः न्ह्यः ब्यूगु ख्याच्वःयात कार्यान्वयन याना बैठक अवरुद्ध याःगु खः । सरकार व थःपिनिगु दथुइ जूगु प्यंगू बुँदे सहमति कार्यान्वयन यायेत माग यानावःगु एमाओवादीलिसेया विपक्षी दलतय्सं संसद् अवरुद्ध याःगु खः ।

संसद् बैठकपाखें हे एमाओवादी नायः पुष्पकमल दाहालं प्यंगू बुँदे कार्यान्वयन मजूत्तले संसद् न्ह्याकेमफइगु उद्घोष नापं याःगु खः । दाहाल नेतृत्वया गणतान्त्रिक मोर्चां वंगु शुक्रवाः नं संसद् बैठक अवरुद्ध याःगु खः ।

थ्वहे दथुइ, मन्त्रिपरिषद्ं मनोनयन याःपिं झिंच्याम्ह सभासद् संसद् बैठकय् ब्वति कायेगुपाखें बञ्चित जूगु दु । संविधानसभा सचिवालययात मनोनयन सम्बन्धी पौ प्राप्त मजूगु हुनि क्यनाः उमिगु सपथ जुइफुगु मदुनि । उकिं उपिं संसद्य् ब्वति कायेमखंगु खः ।