नागरिक बेपत्ता सम्बन्धी थौं अन्तर्राष्ट्रिय दिवस
येँ/ थौं अगष्ट ३० तारिख, नागरिक बेपत्ता सम्बन्धी अन्तर्राष्ट्रिय दिवस । नेपालय् नं सरोकारवाला निकायपाखें थीथी ज्याझ्वःया ग्वसाः ग्वयाः हनाच्वंगु दु ।
हलिमय् बेपत्ता जूपिं मनूया अवस्थायाबारे छेँजः, थःथिति व कानुनी प्रतिनिधितय्त जानकारी मब्यूगु सम्बन्धय् सम्बन्धित पक्षया ध्यानाकर्षण याकेगु उद्देश्यं थुगु दिवस हनेगु यानावःगु खः ।
सन् १९८१ सं ल्याटिन अमेरिकी देश कोष्टारिकाय् गोप्य रूपं थुनेगु लिसे जबर्जस्ती थुनेगुविरुद्ध अनया थीथी संघसंस्थात लिसे मनूत छधी जुयाः महासंघ नीस्वंगु दिंया रूपय् थ्व दिवस हनाः वयाच्वंगु खः ।
मानवअधिकारकःमि, नागरिक समाज, मानवअधिकारया क्षेत्रय् ज्या याइगु थीथी संघसंस्थातय्सं ज्याझ्वःया ग्वसाः ग्वःगु खः । नेपालय् सशस्त्र माओवादी युद्धया इलय् राज्य व माओवादी निगुलिं पक्षपाखें बेपत्ता याःपिं द्वःछि व प्यसःया हाराहारीइ मनूतय्गु अवस्था अझ नं अज्ञात हे तिनि ।
सरकार व तत्कालीन विद्रोही माओवादीदथुइ जूगु विस्तृत शान्ति सम्झौताया छगू बुँदाय् निगुलिं पक्षपाखें बेपत्ता जूपिं सम्झौता जूगु तिथिया ख्वीन्हुया दुने सार्वजनिक यायेगु न्ह्यःथनातःगु दु । तर थुकिया कार्यान्वयन धाःसा आःतक्क नं जूगु मदुनि ।
