संविधानसभादुनें हे सहमति मालेमा : मन्त्री आचार्य
पर्वत/ संविधानसभादुनें हे विवादित विषयमा सहमति मालेमाःगु संस्कृति, पर्यटन लिसे नागरिक उड्डयनमन्त्री भीमप्रसाद आचार्यं धयादीगु दु । प्रमुख सत्तासाझेदार दल नेकपा एमालेया छ्याञ्जे नापं जुयाच्वनादीम्ह मन्त्री आयार्चं विवादित विषयसं संविधानसभापिनें सहमति माःसा व देय्या नितिं दुर्भाग्य जुइगु धयादीगु दु ।
एमाले पर्वतया ज्याकुथिइ थौं कार्यकर्तातय्गु दथुइ न्ववानादिसें वय्कलं संविधानसभादुने हे फुक्क दलया नेतात दुगुलिं थःथवय् दुगु कचवंत ज्यंकाः संविधान निर्माणय् ध्यान केन्द्रित यायेमाःगु बिचाः प्वंकादीगु दु ।
उच्चस्तरीय राजनीतिक समिति आवश्यक मजूगु धयादिसें आचार्यं संविधान निर्माणय् बाह्य समितिलिसे ग्वाहालि फ्वंसा अज्याःगु संविधान थःपिंत मान्य मजुइगु ख्याच्वः नापं ब्यूगु दु । संविधानया विवादित विषयसं संविधानसभा स्वयां पिनेया समितिइ सहलह व निर्णय याना संविधान जारी जूसा देय् व जनताया नितिं कुठाराघात जुइगु वय्कःया दाबी दु ।
क्षेत्रीय व जातीय आधारय् देशय् संघीयता दयेकेत राष्ट्रविरोधी व बिखण्डनकारी जूगु द्वपं ब्यूसें मन्त्री आचार्यं जातीयता व क्षेत्रीयताया मुद्दा ल्ह्वना संविधान मदयेकेगु बरु अःखतं देय्यात झन् तःधंगु ल्वापुइ लाकेगु कासा जुइत्यंगु धयादीगु दु ।
