राजनीतिक संयन्त्र गठनया विवादं संसद् बैठक अनिश्चित

एमाओवादी नेतृत्वया विपक्षी मोर्चाया बैठक च्वनीगु

येँ/ प्रमुख दलतदथुइ उच्चस्तरीय राजनीतिक संयन्त्र नीस्वनेगु विषयसं कचवं तच्वया वंगु दु । सहमति जुइमफयाः बैठक नापं अनिश्चित जुजुं वनाच्वंगु दुसा एमाओवादी नेतृत्वया संघीय गणतान्त्रिक मोर्चां उच्चस्तरीय राजनीतिक संयन्त्रया गठनलिसे प्यंगू बुँदे सहमति कार्यान्वयन मजूसा थौं च्वनीगु व्यवस्थापिका संसद्या बैठक अवरुद्ध यायेगु न्ह्यःथंगु दु ।

संसद्या बैठक न्हिनय् छताः इलय् सःतूगु दु । एमाओवादीं अडान मत्वतेवं सत्ताय् दुगु नेपाली कांग्रेस व नेकपा एमाले संयन्त्र गठनया न्हूगु विकल्प मालेत स्वयाच्वंगु दु । उमिसं एमाओवादीलिस स्वंगू दलया ब्वतिइ संयन्त्र दयेकेमाःगु न्हूगु प्रस्ताव याःगु दु । संयन्त्र तःधंगु दयेकेबलय् सरकार सञ्चालन व संविधान निर्माणय् झन् पंगः जुइगु उमिगु धापू दु । तर एमाओवादीं मधेशी दललिसे सम्बन्ध धाःसा त्वःतेत तयार जूगु मदुनि । थौं प्रमुख दलतदथुइ उकियात कयाः थप सहलह जुइत्यंगु दु ।

थ्वहेदथुइ, एमाओवादी नेतृत्वया संघीय गणतान्त्रिक मोर्चाया बैठक थौं नं च्वनेत्यंगु दु । थौं सुथसिया झिताः इलय् सिंहदरबारय् च्वनीगु बैठकय् उच्चस्तरीय राजनीतिक संयन्त्रया गठन, नीखुम्ह सभासद्या मनोनयन व संविधानया अन्तर्वस्तुइ सहलह केन्द्रित जुइ । प्यंगू बुँदे सहमति कार्यान्वयन मजूसा संसद् अवरुद्ध यायेगु निर्णय याःगु मोर्चां राजनीतिक समितिइ जुइगु ब्वति व उकिया नेतृत्वया विषयसं धाःसा क्वःछ्यूगु मदुनि ।

सद्भावना पार्टी नेपालया ल्यू नायः मोर्चाया प्रवक्ता लक्ष्मणलाल कर्णं विहीवाः राजनीतिक संयन्त्र गठन व नीखुम्ह सभासद्या विषययात कयाः क्वःछी मफुगुलिं थौं थप सहलह जुइत्यंगु खः । राजनीतिक संयन्त्र नीस्वनेगुलिइ सत्तासिन दल सहमत मजूसा संसद् न्ह्याके मबीगु विषयसं सहमति जुइधुंकूगुलिं थौं उकिइ नापं थप सहलह जुइगु न्ह्यःथंगु दु ।