संविधानया नां ‘नेपालको संविधान’ तयेगुलिइ दलतदथुइ सहमति
येँ/ वइगु संविधानया नां ‘नेपालको संविधान’ जुइगु संवैधानिक राजनीतिक संवाद एवं सहमति समितिया थौं क्वचाःगु बैठकं वइगु संविधानया नां ‘नेपालको संविधान’ जुइगुलिइ सहमति याःगु दु ।
सिंहदरबारय् थौं च्वंगु समितिया बैठकय् उगु सहमति जूगु नेकपा एमालेया वरिष्ठ नेता झलनाथ खनालं जानकारी बियादीगु दु । बैठकं नेपाःया स्वाधीनता, राष्ट्रिय अखण्डता व नेपाःमि जनताय् निहीत सार्वभौभसत्तायात अपरिवर्तनीय विषयया रूपय् स्वयेगुकथं सहमति याःगु नेपाली कांग्रेसया नेता अर्जुननरसिंह केसीं जानकारी बियादीगु दु ।
वय्कःयाकथं मौलिक हक, मानवअधिकार, पे्रस स्वतन्त्रता, बहुलवाद, विधिया शासन, आवधिक निर्वाचन थेंज्याःगु विषययात प्रस्तावनाय् कःघायेगु सहमति जूगु दु । प्रस्तावनाय् कःघाइगु उगु विषयया संशोधन यायेत संसद्य् निगू तिहाई मत कायम याना उकियात जनमत संग्रहसं यंकेमाःगु सहमति नापं जूगु दु ।
संविधानया मेमेगु पक्ष लिसे विषय संशोधनया नितिं प्रचलित कानुनकथं निगू तिहाई मतया आधारय् यायेमाःगु सहमति जूगु केसीं धयादिल ।
