संविधान निर्माणय् उच्चस्तरीय राजनीतिक समिति आवश्यक मदु : नेता विष्ट
बुटवल/ नेकपा (एमाले) या छ्याञ्जे गोकर्ण विष्टं संविधान निर्माणया नितिं उच्चस्तरीय राजनीतिक समिति आवश्यक मदुगु धयादीगु दु । वय्कलं संविधानसभा हे सार्वभौम जूगुलिं संविधान निर्माणया झ्वलय् वइगु विवादया समाधान संविधानसभादुनें हे मालेमाःगु धयादीगु दु ।
प्रेस चौतारी रुपन्देहीपाखें थौं बुटवलय् ग्वसाः ग्वःगु पत्रकार नापलाये ज्याय् न्ववानादिसें छ्याञ्जे विष्टं संविधान निर्माणय् पंगः थनेत उच्चस्तरीय राजनीतिक समितिया खँ हःगु द्वपं नापं बियादीगु दु ।
संविधान निर्माणय् राजनीतिक दल गम्भीर जुइमाःगु खँ तयादिसें वय्कलं सरकार नीस्वनेगु इलय् जूगु सहमतियात नेपाली कांग्रेसं पूर्ण कार्यान्वयन यायेमाःगु बिचाः तयादीगु खः ।
संविधानसभापाखें निर्धारित कार्यतालिकाकथं फुक्क विषयसं सहमति चूलाकेमाःगु धयादिसें छ्याञ्जे विष्टं मेमेगु ज्यायात थाति तयाः जूसां नं संविधान निर्माणयात न्ह्यःने न्ह्याकेमाःगु खँय् बहः नापं बियादीगु दु ।
