पीटीए–पीडीए सम्झौताविरुद्ध झिगू वाम दल सतकय्
एमाले, एमाओवादी व नेमकिपाबाहेक “फुक्क वाम, छगू थासय्”
येँ/ भारतलिसे यायेत्यंगु विद्युत व्यापार सम्झौताया विरोधय् नेकपा–माओवादीलिसेया झिगू वाम दलं आन्दोलन घोषणा याःगु दु । थौं बुद्धनगरय् च्वंगु झिगू दलया बैठकं विद्युत व्यापार सम्झौता (पीटीए) व माथिल्लो कर्णालीया विद्युत विकास सम्झौता (पीडीए) विरुद्ध गोष्ठी व विरोध प्रदर्शनलिसेया आन्दोलन घोषणा याःगु खः ।
आन्दोलनया ज्याझ्वःकथं भदौ १३ गते गोष्ठीया ग्वसाः ग्वइगु जूगु दु । अथेहे भदौ १७ गते प्यताः इलय् येँया शान्तिबाटिकाय् विरोध प्रदर्शन यायेगु निर्णय जूगु बैठकय् ब्वति दुम्ह छम्ह नेतां जानकारी ब्यूगु दु ।
वैद्य माओवादीया नापनापं सरकारय् ब्वति दुम्ह सीपी मैनाली नेतृत्वया नेकपा माले नापं विरोधय् नापं दइगु न्ह्यःथंगु दु । अथेहे चित्रबहादुर केसी नेतृत्वया राष्ट्रिय जनमोर्चा, नेकपा मसाल लगायतया चीधंगु वामपन्थी दलत झिगू दलीय मोर्चाय् दु । नेमकिपा, एमाओवादी व एमालेबाहेकया वाम दलत पीटीए व पीडीएया विरोधय् छधी जूगु खः ।
