प्रधानमन्त्री व माओवादी नायः वैद्यदथुइ नापलायेज्या
कन्हय्या नितिं माओवादीलिसे प्यंगू दलया बैठक इनाप
येँ/ प्रधानमन्त्री सुशील कोइराला व नेकपा–माओवादीया नायः मोहन वैद्य किरणदथुइ नापलायेज्या जूगु दु । प्रधानमन्त्री निवास बालुवाटारय् थौं जूगु नापलाये ज्याय् संविधान निर्माणया थीथी विषयवस्तुबारे खँल्हाबल्हा जूगु प्रधानमन्त्रीया निजी सचिवालयं जानकारी ब्यूगु दु । उगु हे लसताय् माओवादीं सर्वपक्षीय भेलापाखें संविधानया अन्तरवस्तुबारे सहमति मालेत प्रस्ताव तःगु सीदुगु दु ।
नापनापं नेकपा–माओवादीया मागयात सम्बोधन यानाः वर्तमान संविधानसभापाखें निर्धारित इलय् संविधान निर्माण याना गुकथं वनेफइ धइगु विषयसं खँल्हाबल्हा जूगु कांग्रेस उपसभापति रामचन्द्र पौडेलं जानकारी बियादीगु दु । नापलाये ज्याय् वैद्यं सर्वपक्षीय राजनीतिक सम्मेलन यायेमाःगु पुलांगु हे अडान लिसाकाःगु दु ।
थुगु विषयसं थप सहलह यायेत कन्हय् बुधवाः नेपाली कांग्रेस, नेकपा एमाले, एकीकृत नेकपा माओवादी व नेकपा–माओवादीया मंकाः बैठक सःतूगु दु । अथेन एमाओवादीं धाःसा उच्चस्तरीय राजनीतिक समिति नीमस्वंत्तले छु नं सहलहसं मच्वनेगु धयाः वयाच्वंगु दु ।
