सदनय् कांग्रेस–एमालेदथुइ थुकथं न्ह्यज्यात प्रचण्ड
पेलेयाना वंसा तःधंगु दुर्घटना फयेमालिगु ख्याच्वः
येँ/ एकीकृत नेकपा माओवादीया नायः पुष्पकमल दाहाल प्रचण्डं अंकगणितीय रूपं पेलेयाना वनेत स्वःसा तःधंगु दुर्घटना फयेमालिगु ख्याच्वः ब्यूगु दु ।
व्यवस्थापिका संसद्या थौंया बैठकय् तसकं कडा रूपं न्ह्यज्याम्ह प्रचण्डं कांग्रेस–एमालें बहुमतया आधारय् पेलेयाना न्ह्यःने न्ह्यायेत स्वःगु द्वपं नापं ब्यूगु दु । छगू पक्षयात निषेध याना समाधान पिहाँमवइगु धयादिसें वय्कलं धयादी – ‘पेलेयाना वनेत स्वल धाःसा थ्व देय् तःधंगु दुर्घटना लायेफु । अंक गणितपाखें फैसला जुइमखु, राजनीतिक समझदारीया आधारय् जुइमा ।’
विशेष ई कयाः न्वंवानादीम्ह प्रचण्डं प्यंगू बुँदे सहमतिकथं याकनं उच्चस्तरीय राजनीतिक समिति नीस्वनेत नापं माग याःगु दु । ‘राजनीतिक समिति मदयेकीगु धइगु शान्ति प्रक्रियाया विरोध यायेगु खः, संविधान निर्माणया विरोध यायेगु खः’ वय्कलं धयादी, ‘थुकिं छु खनेदु धाःसा, दुनेदुनें हे खिचडी ला बुनाः च्वंगु मदु ? अंकगणितीय रूपं पेलेयाना वनेफु धाइपिंसं ज्या यानाच्वंगु जकं मदुला ?’
थ्व स्वयाः न्ह्यः सोमवाः प्रधानमन्त्री सुशील कोइरालायात नापलानाः एमाओवादी नायः पुष्पकमल दाहालं याकनं प्यंगू बुँदे सहमति कार्यान्वयन जुइमाःगु माग याःगु खः । एमाओवादी नेतृत्वया संघीय गणतान्त्रिक मोर्चां प्यंगू बुँदे सहमति नीप्यघौदुने कार्यान्वयन मयाःसा सदन अवरुद्ध यायेगु ख्याच्वः नापं बीधुंकूगु दु ।
