एमाओवादी लिसे मधेशी दलतय्सं संसद् घेरय् याइगु
येँ/ एमाओवादी लिसे मधेशी दलतय्सं संसद् घेरय् याइगु जूगु दु । उच्चस्तरीय राजनीतिक समिति नीस्वनेत कांग्रेस एमाले असहमत जूगु विरोधय् प्रमुख प्रतिपक्षी एमाओवादी लिसे मधेशी दलतय्सं संसद् घेरय् यायेत्यंगु खः ।
एमाओवादी लिसे मधेश केन्द्रित दलतय्गु थौं च्वंगु मंकाः बैठकं कन्हय् बुधवाःतक्क उच्चस्तरीय समिति नीमस्वंसा संसद् अवरुद्ध यायेगु निर्णय याःगु खः । बैठकं प्यंगू बुँदे सहमतिया कार्यान्वयनय् कांग्रेस एमाले उदासिन व गैरजिम्मेवार खनेदुगु द्वपं ब्यूसें सहमति कार्यान्वयन मजुइवं संगठित संघर्ष यायेगु निर्णय याःगु खः । बैठकय् एमाओवादीया नायः पुष्पकमल दाहाल लिसे मधेश केन्द्रित दलया नेतातय्गु आपालं ब्वति दुगु खः ।
सोमवाः प्रधानमन्त्री सुशील कोइरालायात एमाओवादीया नायः प्रचण्डं नापलानाः प्यंगू बुँदे सहमति कार्यान्वयन मजूसा सतक व संसद् निख्यरं संघर्ष यायेगु ख्याच्वः ब्यूगु खः ।
