संसद्य् किसि व खिचायात राष्ट्रिय जनावर दयेकेत माग
येँ/ व्यवस्थापिका संसद् अन्तर्गत थौंया बैठकय् न्वंवानादिसें सुं सुं सभासद्तय्सं गोरखाय् साः स्यानाः नःगु विषयसं जूगु कचवंलिपा ब्वलंगु तनावय् छम्ह सर्वसाधारण सीगु घटनायात कयाः विरोध याःगु दु ।
गोरखाय् छुं दिं न्ह्यः जक साः स्याःगु विषयसं जूगु कचवंलिपा ब्वलंगु ल्वापुया झ्वलय् प्रहरीया गोली लानाः लाक्पा तामाङ सीगु खः, उगु हे विषययात कयाः सभासद्ं च्यूताः नापं प्वंकूगु दु । सभासद् रामकुमार राईं सीम्ह तामाङया छेँजःया बिचाः राज्यं यायेमाःगु माग नापं याःगु दु ।
सभासद् रामकुमार राईं सीम्ह तामाङया छेँजःया बिचाः राज्यं यायेमाःगु माग याःगु खः । राईं सीम्हसिया छेँजःयात झिगू लख तका राहत धेबा ब्यूगुलिइ च्यूताः नापं प्वंकूगु दु । अथेहे, मेम्ह सभासद् शिवलाल थापां साः स्याःगु घटनाय् प्रहरीं गोली कयेकूगु न्ह्यःथना कारबाहीया माग याःगु खः । वय्कलं न्ह्यसः तयादी – आदिवासी जनजातिं नइम्ह साःयात छाय् राष्ट्रिय जनावर दयेकातःगु, किसि व खिचा आदियात राष्ट्रिय जनवार दयेके मज्यूला ?
संसद्य् सभासद्तय्सं चलः लगायत समसामयिक विषयसं थःथःगु बिचाः तयाच्वंगु दु । बैठकं संसदीय समितिया सभापतिपिनिगु निर्वाचनया कार्यतालिका दयेकीगु सम्भावना दु ।
