जनतायात मान्य मजुइगु संविधान अस्वीकार्य : वैद्य
पाल्पा/ नेकपा–माओवादीया नायः मोहन वैद्यं नेपाःमि जनतायात मान्य मजुइगु संविधान थःगु पार्टीयात नं मान्य मजुइगु धयादीगु दु ।
क्रान्तिकारी पत्रकार महासंघ पाल्पापाखें थौं ग्वसाः ग्वःगु पत्रकार सम्मेलनय् नायः वैद्यं संविधानसभापाखें संविधान दयेके मफइगु धयादिसें संविधानसभा खारेज यायेत माग यानादिल ।
जनतायात मान्य मजुइगु संविधान जारी याना सरकार न्ह्यःने न्ह्याःसा माओवादीं आन्दोलनया ज्याझ्वःत सार्वजनिक याना न्ह्यःने न्ह्यायेगु धयादीगु दु । ‘आन्दोलनय् बल नं छ्यलेफु, सरकारया गतिविधिं जिमिगु आन्दोलनया स्वरूप तयार याइ’ नायः वैद्यं धयादिल । सर्वपक्षीय राजनीतिक सम्मेलनं हे देय्या निकास पिकाइगु वय्कःया बिचाः खः ।
जनताया विश्वास त्याकाः माओवादीं क्रान्ति याइगु धयादिसें वय्कलं नेपाःमि जनताया मुक्तिया नितिं संघर्ष याइगु न्ह्यःथनादिल । पार्टीया छ्याञ्जे देव गुरुङं कटवाल प्रकरणय् एकीकृत नेकपा माओवादीया नायः प्रचण्डं कटवालयात कारबाही यायेत तयार जूबलय् माओवादी समस्याय् लाःगु खँ न्ह्यःथनादिल ।
