पहिचानसहितया संघियताय् नेतातय्गु ग्याचिकु

संघीयताया थीथी मोडेल दयेफु, तर छता खँ छु धा:सा संघीय शासनय् प्रदेशया नामाकरण यायेगुली जातिभाषाया नांहे दक्कय् न्ह्य:ने वइ, प्राथमिकता वीमा:गु खइ । भारतया प्रदेशया नां व चीनया तिव्वत, उइगुर आदी स्वायत्त क्षेत्रया नां स्वयेबलय् थ्व खँ अ:पुके हे थू । थ्व खँ नेतातसें मथूगु ला मखु, गाक्कं थू । तर अथे यायेबलय् थन न्हापांनिसें उत्पीडनय् लानाच्वंपि जनतायात अधिकार बीमालीगु ख:ला धका: नेतात ग्यानाच्वंगु दु । वसिंक नं थ:पिसं उपयोग यानाच्वंगु अधिकार कटौती जुइगु चिन्तां इमित चिन्तित यनाच्वंगु खनेदु ।
दक्कय् न्हापां ला नेपा: राष्ट्र हे उलि शक्तिशाली व सम्पन्न देय् मखु । थन थनया प्राकृतिक स्रोत साधन प्रयोग, पर्यटनया विकास, जडीबुटी आदीया प्रयोग, उद्योग धन्दा खास हे विकास जूगु मखु । भ्रष्टाचारं देय् भ्वाभ: जुइधुंकल थुज्व:गु अवस्थाय् छगू स्रोत साधान फुक्क केन्द्रित याना: छथ्व: मनूतसे जुकेगु व इनेगु ज्या याना: थ:पिं कुर्सीइ च्वनाच्वंगु दु । थुज्व:गु अवस्थाय् थीथी प्रदेशय् स्रोत प्रयोग जुइगु व अनया जनतां हे उकियात प्रयोग याइगु जुल धा:सा आ:तक यानाच्वंगु हालिम्बा:लि कटौती जुइगु ला निश्चित हे ख: ।
हानं जातिय पहिचान बीवं मनूत जातिय रुपं हे संगठित जुइ । म्हिग:तक विचा:या आधारय् जनतायात संगठित यनात:गुली थ:पिंहे उगु विचा:कथं न्ह्या: मवनेधुंकूगुलिं विचा:या आकर्षण मन्त । कार्यकर्ता व जनतां विश्वास नं मयात । थ्व इलय् आदिवासी जनजातिहे न्हूगु शक्तिया रुपय् अभ्यूदय जूगु दु । यदि जातिय पहिचान बिया: प्रदेशया नामाकरण जुइवं जनता फुक्कं उगुहे धारय् ब्वाँय् वनेगु खतरा दु, थुकि नेतात्यगु नेतृत्वय्हे त:धंगु असर लाका राज्यया पुर्नसंरचना जुल धायेवं आ: नेपा:या राजनीतिक दलगत संरचनाय नं ह्यूपा: वइ । थुकी नं जातिय नामं प्रदशेया नां तयेबलय् लिपा थ्यंक उकथंहे मनूत संगठित जूवनेगु संभावय् अप्वइ । हानं नेतात आपा: याना: येँय् च्वं वये धुंकूगु दु । थुगु थाय्यात नेवा: प्रदेश धायेगु व थ:त नेवा: प्रदेशया वासिन्दा धायेगु इच्छा नं इमिके मदु । थ्व ला इमिगु नितिं त:धंगु हे ‘मोरल डाउन’ जुइगु खँकथं उकथं कयाच्वंगु दु । हानं आ:हे खँय्तय्गु नं खसान व जडान प्रदेश दु । कर्णाली थुज्व:गु अविकसित पहाडया मनूत धका: सुनां नं नां कयाबी धका: नं इपिं ग्या: । थुकथं नेपालय् प्रदेशया नामाकरण जातीय पहिचान बीत थाकु चायाच्वंगुया ल्यूने थुकथंया हे मानसिकतां आपा: ज्या यानाच्वंगु खनेदु ।

More Stories Like this