प्रचण्डया हे गृहजिल्लाय् बाबुरामया ब्यागलं कमिटी
चितवन/ पार्टीदुनेया अन्तर कलह तच्वयाः वनाः एकीकृत माओवादीया नेता डा. बाबुराम भट्टराई पक्षं नायः पुष्पकमल दाहालया गृहजिल्ला चितवनय् हे समानान्तर जिल्ला कमिटी दयेकूगु दु । प्रचण्डया गृहजिल्लाय् भट्टराई पक्षया नेतां जिल्ला दुजःलिसे पूर्वसेक्रेटरी रमेश रेग्मीया नायःसुइ कमिटी नीस्वंगु खः ।
संस्थापन पक्षया नेतां गुटगत शैली मत्वःतूगुलिं ब्यागलं कमिटी दयेकेमाःगु समानान्तर कमिटीया नायः रेग्मीं दाबी याःगु दु । भरतपुरय् याःगु भेलापाखें न्ययेछम्ह दुजः दुगु कमिटी नीस्वंगु खः ।
पार्टीइ वैचारिक बहस व्यवस्थापन समिति दयेकाः कचवं ज्यंकेगु कुतः जूसांनिसें हे भट्टराई पक्षं समानान्तर समिति नीस्वनेगुयात तीब्रता ब्यूगु खः । उमिसं येँ, सिन्धुली, मकवानपुर, धनुषालगायत जिल्लाय् समानान्तर समिति दयेकूगु दु । कचवंया हे दथुइ पार्टीं भट्टराई पक्षया छुं छुं केन्द्रीय नेतातय्त कारबाही नापं याःगु दु ।
