कांग्रेस–एमालेदथुइ छुनं कचवं मदु : सुजाता
पोखरा/ नेपाली कांग्रेसया नेतृ सुजाता कोइरालां सत्तारुढ दल कांग्रेस व एमालेदथुइ छुनं कचवं मदुगु व निगुलिं पार्टी छधी जुयाः न्ह्यःने न्ह्यायेमाःगु बिचाः प्वंकादीगु दु । नेपाल प्रेस युनियन कास्कीं थौं पोखराय् ग्वसाः ग्वःगु पत्रकार नापलायेगु ज्याझ्वलय् न्ववानादिसें वय्कलं राजनीतिक स्थायित्व, न्हूगु संविधान जारी यायेत व विकासया नितिं थुपिं निगू पार्टी छधी मजुइकं सुख मसीगु खँ न्ह्यथनादीगु दु ।
पार्टीया केन्द्रीय दुजः नापं जुयाच्वनादीम्ह सांसद् कोइरालां कांग्रेस गुटैगुटं जाःगु पार्टी जूगु धयादिसें गुट उपगुटया भावना तइपिं सुयागु नं उन्नति मजुइगु ख्याच्वः नापं बियादीगु खः ।
ज्याझ्वलय् सभासद्पिं यज्ञबहादुर थापा, जीवन परियार, शारदा पौडेलं क्वःछ्यूगु इलय् हे न्हूगु संविधान जारी जुइगु विश्वास प्वंकादीगु दु । युनियनया सभापति शिरोमणि बरालया नायःसुइ जूगु ज्याझ्वलय् उपसभापति माधव रेग्मी व छ्याञ्जे प्रकाशचन्द्र सापकोटां थःथःगु नुगः खँ तयादीगु खः ।
उगु हे झ्वलय् थ्वहे भाद्र २१ व २२ गते जुइगु नेपाल प्रेस युनियनया महाधिवेशन क्वचायेकेत सभासद् शारदा पौडेलं नीन्याद्वः तका (२५ हजार) व सीता गुरुङं न्याद्वः व न्यासः तका (पाँच हजार पाँच सय) ग्वाहालि नापं यानादीगु खः ।
