एमाओवादीपाखें स्वंगू दलया बैठक बहिष्कार
येँ/ उच्चतरीय राजनीतिक समिति नीस्वनेगु प्रस्तावय् कांग्रेस व एमालें असहमति क्यनेवं एकीकृत नेकपा माओवादीं मू स्वंगू दलया बैठक बहिष्कार याःगु दु । बालुवाटारय् च्वंगु बैठकय् सहलह जुयाच्वंगु इलय् एकीकृत माओवादी उच्चतरीय राजनीतिक समिति नीस्वनेगु प्रस्तावय् कांग्रेस व एमालें असहमति क्यंगु न्ह्यःथना पिहाँवंगु एमाले न्वकु भीम रावलं जानकारी ब्यूगु दु ।
बैठकय् एमाओवादीया नायः पुष्पकमल दाहाल प्रचण्डं संविधान निर्माण प्रक्रियायात गति बीत उच्चस्तरीय राजनीतिक समिति नीस्वनेमाःगु न्ह्यःथना उकिया कजि थःहे जुइमाःगु अडान काःगु खः । लिसलय् कांग्रेस एमालेया नेतातय्सं धाःसा संविधान निर्माण यायेगु विषयसं दलतदथुइ सहलह जुयाच्वंगु न्ह्यःथना समिति आवश्यक मजूगु खँ न्ह्यःथंगु न्वकु रावलं जानकारी ब्यूगु दु ।
‘समिति नीस्वनेगु खँय् पालंपाः नेतृत्व याये धाःबलय् प्रचण्डलगायतया नेतात बैठकपाखें दनाः वंगु रावलं न्ह्यःथंगु दु । थःपिनिगु माग पूमवनीगु जुइवं एमाओवादीं स्वंगू दलया बैठकय् हे मच्वनेगु घोषणा याःगु दु । थौं हे सनिलय् सत्तारुढ शीर्ष निगू दल कांग्रेस व एमालेया बैठक च्वनेत्यंगु दु ।
