मृदुला सभासद् जुइगु जुइवं सुजातायात तनाव
येँ/ प्रधानमन्त्री लिसे नेपाली कांग्रेसया सभापति सुशील कोइरालां पारिवारिक दुजः मृदुला कोइरालायात सभासद् दयेकेगु तयारी यायेवं कांग्रेस नेतृ सुजाता कोइरालायात तनाव जूगु दु ।
नेपाली कांग्रेसं मनोनित कोटाय् दइपिं सभासद्या धलखय् अमेरिकाय् च्वना वःम्ह मृदुलाया नां नापं दयेवं सुजातां उकिया विरोधय् सार्वजनिक अभिव्यक्ति नापं ब्यूगु दु । तनहुँसं थौं सञ्चारकःमिपिं नापं खँल्हानादिसें कोइरालां ग्रीनकार्ड काःम्ह मनूयात राजदूत व सभासद् दयेके मज्यूगु धयादीगु खः । नां प्रष्ट मयाःसां नं वय्कःया संकेत अमेरिकाय् च्वना वःम्ह मृदुलापाखे दुगु खँ सीकेत धाःसा थाकु मजू ।
सुजातां धयादी – विदेशय् च्वना वःम्ह मनूयात राजदूत वा सभासद् दयेकेगु पाय्छि मजू । लुमंके बहःजु, छुं ई न्ह्यः जक अमेरिकाय् च्वना वःम्ह मृदुलां लिपांगु इलय् प्रधानमन्त्री कोइरालाया बिचाः यानादीगु खः । प्रवास संगठनय् च्वना ज्या यानादीम्ह मृदुला नेपाः वयेधुनेवं प्रधानमन्त्रीया निजी ग्वाहालिमि लक्ष्मण ढकाललिसे कचवं जूगु खः । उगु हे कचवंलय् मृदुला हाबी जुइवं ढकालयात कोइरालां निजी ग्वाहालिमिपाखें चीकूगु खः ।
