बलिउड स्टार शाहरुख खान विवादय्

एजेन्सी/ बलिउडका नांजाःम्ह नायः (हिरो) शाहरुख खान थौंकन्हय् हाकनं छक्वः विवादय् लाःगु दु । वयागु विवादया हुनि मेगु मजूसे थःगु हे छेँया हुनि विवादय् लाःगु खः ।

छाय्धाःसा शाहरुख खानं थःगु हे छेँय्यापिने पार्क दयेकूगु दु । उगु हे पार्कया हुनिं वया हे लागाया जःखः च्वनीपिं मनूत तँचाःगु खः । उगु लागाया स्थानीय मनूतय्सं पार्कया हुनिं लँजुवाःतय्त समस्याय् लाकूगु द्वपं नापं ब्यूगु दु । थुलिजक मजुसे पार्कया हे हुनिं माउण्ट मेरी चर्चतक्क वनेगु स्वाहाने नापं बन्द जूगु दु ।

अनया मनूतय्सं वंगु सेप्टेम्बरय् उगु समस्या ज्यंकेगु नितिं रिपोर्ट याःगु जूसां आःतक्क छु नं कारबाही धाःसा जूगु मदुनि । उगु समस्यायात कयाः थुगुसी धाःसा अनया मनूत बीएमसी कमिश्नर र मुख्यमन्त्रीयात नापं नापलाःगु दु ।

स्थानीय मनूतय्गु तच्वःगु दवाबलिपा बीएमसी कारबाही यायेगु न्ह्यःथना पार्कया निरीक्षणया नितिं याकनं हे इन्जिनियर नापं छ्वइगु जूगु दु ।

More Stories Like this