तिँख्यःपाखें नेपाली ध्वाँय्या विश्व रेकर्ड
येँ/ येँया तिख्यलय् गिनिज बुक अफ वर्ल्ड रेकर्ड कायम यायेगु तातुनाः थौं द्वलंद्वः मनूतय्गु ब्वतिइ नेपाःया राष्ट्रिय ध्वाँय्या प्रदर्शनी याःगु दु । ‘शान्ति र समृद्धिया नितिं मानवीय मूल्य’ धइगु संस्थाया ग्वाहालिइ स्कूल लिसे कलेजया युवा स्वयंसेवीया रूपय् मानव ध्वाँय् निर्माणय् ब्वति दुगु खः । स्वीन्याद्वः व झिंखुम्ह (३५ हजार १६) मनुखं नेपाःया ध्वाँय्या आकृति दयेकूगु ग्वसाः खलकं जानकारी ब्यूगु दु ।
नेपाःया राष्ट्रिय ध्वाँया लम्बाई १ सय ६० मिटर व चौडाइ १ सय २६ मिटरया दयेकूगु खः । स्कूल–कलेजया विद्यार्थीपिनिगु ब्वति दुगु उगु ज्याझ्वलय् उमिसं नेपाःया ध्वाँय्या उँ (रङ्ग) कथंया प्लेकार्ड झिगू मिनेटतक्क ल्ह्वंगु खः । ह्याउँगु, वचुँगु व तुयूगु उँया चिचीधंगु प्लेकार्ड ल्ह्वनाः नेपाली ध्वाँय् दयेकूगु खः ।
उगु प्रदर्शनीयात गिनिज बुक अफ वल्र्ड रेकर्डया प्रतिनिधिं अवलोकन र मापन याःगु ग्वसा: खलकं जानकारी ब्यूगु दु । विश्व रेकर्डय् पाकिस्तानय् २९ हजार ९ सय ५७ पाकिस्तानीतय्सं मानव ध्वाँय् दयेकेधुंकूगु दु । उगु रेकर्ड नेपाःपाखें त्वाःथलेगु नितिं तिँख्यलय् उकथंया प्रदर्शनी याःगु खः ।
