शनिवाः १३ व २३ वडाय् नेवाः प्रदेश जागरण अभियान त्वाः भेला
नेवाः स्वायत्त राज्य मंकाः संघर्ष समितिं नेवाः प्रदेश जागरण अभियानकथं न्ह्याकाच्वंगु त्वाः भेला थ्वहे वइगु शनिवाः सुथय् २३ वडा ओलम्पस क्लवनाप मंकाःकथं जानाः ओमबहाः नःबहिलय् याइगु त्वाः भेला समितिं जानकारी ब्यूगु दु ।
अथेहे शनिवाः हे १३ वडाय् नेवाः स्वायत्त राज्य मंकाः संघर्ष समितिं त्वाः भेला याइगु जूगु दु । उगु भेला लुमन्ति छेँ कालिमातिइ यायेगु निर्णय याःगु दु ।
त्वाः भेला समितिं निगुलिं वडाय् थुकथं त्वाः भेला यायेगु निंतिं च्वंगु तयारी मुँज्यां २३ व १३ वडाय् मूवक्ताकथं समितिया सचिवालय कजि मल्ल के. सुन्दरं सम्बोधन यानादीगु ज्या दु ।
अथेहे २३ वडाय् पूर्व जनप्रतिनिधि पवित्र बज्राचार्य, प्रा. सुवर्ण शाक्यपिसं सम्बोधन याइगु जूगु दु ।
संघर्ष समितिया त्वाः भेला समितिं शुक्रवाः टोखाय् बृहत त्वाः भेला यायेगु निंतिं तयारी मुँज्या तःगु दुसा शुक्रवाः हे नेवाः पत्रकारपिनि दथुइ नेवाः प्रदेश जागरण अभियानकथं जावलाख्यःया ताम्राकार पार्टी प्यालेसय् पत्रकार भेला याइगु जूगु दु ।
