चम्सुरीकथं नांजा:म्ह पल्पसा डंगोल

पल्पसा डंगोलयात आपासिनं चम्सुरी धका: म्हसिउ । थ्व नां वयात ‘मेरी बास्सै’ नांयागु टेलिसिरियलं ब्यूगु ख: । खस नेपाली भाय्या सिरियलं वयात चम्सुरी धका लोकंह्वाका ब्यू थें तुं नेवा: भाय्या संकिपातं नं अथेहे लोकंह्वा:गु नां ब्यूगु तसकं य: हँ पल्पसायात । तर आ: तक अथे जुइमफुनि । खय्तला पल्पसां यक्व हे नेवा: संकिपा म्हिते धुंकल । तर लुधंक, चित्त बुझे जुइक म्हिते खंगु मदुनि धका: धाइम्ह पल्पसा डंगोलयात थ:म्हेसिनं हे लाय् तया दयेकूगु ‘सत्य धरोधर्म’ नांयागु नेवा: संकिपाय् म्हितूगु मिजं पात्रया रोल छगू हे जक आ:तकया चित्त बुझे जूगु रोल ख: ।
नेवा: भाय्या संकिपा नं आपालं आपा: म्हिता वयाच्वंम्ह पल्पसा डंगोलं म्हितूगु खस नेपाली भाय्या फिल्म व सिरियलत ल्या: खाये हे थाकुइ धुंकल । उकी मध्ये दकलय् चर्चित व लोकंह्वा:गु धइगु ‘मेरी बास्सै’ ख: । आपालं आपा: खस नेपाली भाय्या फिल्म नं म्हिते धुंकूम्ह पल्पसां स्पेनिश भाषाया छगू फिल्म नं म्हितूगु दु । ‘काठमाण्डु – द मिरर इन स्काइ’ नांयागु उगु फिल्मया डाइरेक्टर इसिआर बोलायन मय्जु ख: । वय्क: मय्जु स्पेनया नांजा:म्ह फिल्म डाइरेक्टर ख: । थुगु स्पेनिश फिल्म म्हितेगु ह्व:ता: चूलाका ब्यूगुलिं विजयरत्न दाईयात यक्व यक्व सुभाय् धका: पल्पसां धाल ।
पल्पसा डंगोल धइम्ह कला क्षेत्रय् नुग: क्वसा:म्ह जक मखु । कला ख्य:या विविध ख्यलय् उतिकं हे सना वयाच्वंम्ह ख: । वय्क: मय्जु छम्ह अभिनेत्री जक मखु, हुला प्याखं ख्यलय् दुग्यंम्ह प्रशिक्षक नं ख: । हास्यब्यङ्ग ख्यलय् पल्पसाया बिस्कं म्हसिका दु । उलि जक मखसें कमेडीया ख्यलय् पल्पसा डंगोल व अंशु महर्जन जाना: दयेकूगु जोडीयात थ्व ख्य:या दकलय् न्हापांगु मिसा जोडीया दर्जा नं बियात:गु दु । देय्या थीथी थासय् वना: थ्व जोडीं आपालं आपा: प्रोग्रामत क्यना वयाच्वंगु दु ।
थुकथं न्हिन्हिं चान्हि मधासे थ्व ख्यलय् लगे जुया वयाच्वंमह पल्पसा डंगोलयात मचाबलेनिसें हे प्याखं हुलेगु धाल कि तसकं य:गु जुयाच्वन । अले लिपातक नं प्याखं हुलेगुलि हे लगे जुइगु मति तल । मतित:थें आ: तक लगे जुयाच्वंगु दनि । थीथी कल्चरल सेन्टर हुला प्याखंमि जुया: ज्या नं याना वयाच्वंगु दु । अले न्हून्हूपिन्त हुलाप्याखंया कला नं स्यना वयाच्वंगु दु । पल्पसां हुलाप्याखं स्यनावयाच्वंगु स्कूलय् ज्ञानकुञ्ज बसन्त ऋतु, बाघभैरव, सिद्धार्थ शिशु सदन, रिभर भ्यालि स्कूलया नां न्ह्य:ने ला ।
नृत्य कलाय् पोख्तम्ह पल्पसां थ: गबलें अभिनयया ख्यलय् नं लगे जुइ धका: मति त:गु मदुगु जुयाच्वन । तर बुलुहुं बुलुहुं थुखेपाखे न्ह्यानावंगु पलाखं वयात छम्ह स्यल्ला:म्ह अभिनेत्रीया रुपय् न्ह्य:ने तये हल । पुलांगु खँ लुमंकेगु झ्वलय् पल्पसां धाल, ‘५०/५१ सालपाखेया खँ ख: । एबीसी नेपाल कल्चर ग्रुप नांयागु छगू पुच: दु जिमिगु । व पुच:यात एड्सबारे जनचेतना ब्याकेगु ज्या वल । उकिया निंतिं सतक नाटक यायेमा:गु जुल । दाङ्गय् वना सतक नाटक क्यना । उकिया लिच्व: बांलात । अले लिपा वना एड्स दिवसया झ्वलय् छगू टेलिफिल्म नं दयेकेमा:गु जुल । ‘चेलीको आवाज’ नांयागु टेलिफिल्मय् नं म्हिता । थुकथं जिगु पला: मचायेक हे अभिनयपाखे न्ह्यानावन ।’
पल्पसा डंगोल मय्जुया अभिनयपाखे न्ह्यानाच्वंगु पलाखय् हास्यब्यङ्ग ख्यलय् वयात त:धंगु तिब: बिल । देशया शहरय् जक मखु विदेशय् वना:तकं प्रोग्राम क्यंवने दत । अज्या:गु प्रोग्रामय् अप्व: याना: हुला प्याखं व कमेडी प्रोग्राम हे क्यना वयाच्वंम्ह पल्पसां ‘दृष्टि’ नांयागु छगू जासूसी टेलिसिरियल नं दयेकूगु दु । नेटिभी प्लसय् प्रसारण जूगु थ्व सिरियलयात पहिला मेम्हसित डाइरेक्सनया जिम्मा ब्यूगु ख: । तर छुं ब्व लिपा वं आकाझाकां त्व:ता ब्यूबलय् पल्पसां थ:म्हेसिनं हे डाइरेक्सनया भाला क्वबिल अले सच्छि व खुइन्याब्वतक न्ह्याकल ।
थ:यात चम्सुरीया नामं लोकंह्वाका ब्यूगु ‘मेरी बास्सै’ सिरियलया बारे स्पष्ट यासे पल्पसां कन, ‘‘मेरी बास्सै’ न्हापा ला शहर दुनेया बाखं ज्वना: पिलूव:गु ख: । उगु इलय् उके जिगु रोल मदु । लिपा प्यंगू इपिसोड धुंका: बाखंयात गामय्पाखे यंके त्यंबलय् तिनि उके जित: स:तल । जि इपिं नाप लायेत वनाबले इमिसं अन ‘उ चम्सुरी आयो’ धका: गिजय् या:गु जिं ताल । अन इपिंलिसे रोलया बारे खँल्हाबल्हा जुल । रोल चित्त नं बुझे जुल । अले उगु पात्रयात छु नां बिइगुले धका: खँ व:बलय् व इमिसं जित: चम्सुरी धका: गिजे या:गु लुमंसे वल । अले जिं व पात्रया नां चम्सुरी हे तयेमाली धका: धया । पहिला ला इपिं मछाल । तर जिं जोड यानाबलय् तिनि जिं धात्थें धा:गु ख: धका: सिइकल । अले वहे नां तयेगु क्व:छित । आ: वया: चम्सुरी गुलि लोकंह्वा: धइगु खँ ला सकसिनं सि हे स्यू ।’
कला ख्यलय् लगे जुया: छेँ दयेकल । गाडी न्यायेफत । मस्तय्त नं बांलाक आख: ब्वंकेफत । थ्व कमाइलय् नेवा: संकिपाया ख्य:या गुलि अंश दु ले धइगु न्ह्यस: ब्वलनीगु स्वाभाविक हे ख: । थुकिया बारे स्पष्ट यायेगु झ्वलय् पल्पसां धा:कथं खस नेपाली भाय्या कला ख्यलय् थें नेवा: ख्यलय् उलि दां मदु । तर अय् जूसां नेवा: फिल्म दयेकूपिं मध्ये सकसिनं धइथें पल्पसायात फुथेंचा:थें पारिश्रमिक ब्यूगु खनेदु । ‘आ:तक ध्यबा छग: हे पारिश्रमिक मब्यूम्ह छम्ह हे जक दु ।’ पल्पसां खँ पिकाल । ‘व सु ले ?’ ‘म्वा:ल वय्क:या नां मकाये । थ्व ब्वने धुंका: वय्कलं थ:म्हेसिनं हे वा:चायेका दिइ ।’ पल्पसां धाल ।
थ्व ख्यलय् उलिमछि वर्ष बिते यायेधुंकूम्ह पल्पसाया जीवनय् दकलय् लुमना च्वनीगु खँत छु छु दु ले ? धइगु खँय् पल्पसां कन कि छक्व: पर्वत महोत्सवय् प्रोग्राम क्यंवंगु इलय् थन वया हजुरमां गंगालाल अस्पतालय् तया: वास: याकात:गु जुयाच्वन । अन पर्वतय् छन्हु ज्याझ्व: क्वचायेका: होटेलय् व:गु इलय् वया हजुरमां मन्त धका: खबर वल खनिं । वया तसकं नुग: मछिन । ख्वय् मास्ति वल । अनं ब्वया येँय् वयेमास्ति वल । अले थ्व विषयलय् अनया ग्वसा: खल:लिसे सहलह नं यात । अले इमिसं धाल कि अन चम्सुरी वइ धका: तापाकं तापाकंनिसें मनूत वयाच्वंगु दु, उकि. छि लिहां वन कि ला जिपिं बर्बाद हे जुइ । इमिगु समस्या वा:चायेका: पल्पसां नुगलय् ख्वति तया पिनेंपिनें स्वकुमिपिन्त न्हिइके मा:गु खँ गुबले ल्व:ममनिगु खँ ख: धका: कनसा छक्व: दांगय् ‘मेरी बास्सै’ शुटिंगय् वंगु इलय् नं थन छेँय् मस्तलिसे फोनय् खँ ल्हाये मास् िवइगु तर अन नेटवर्क लगे मजूबलय् वाथावाथा कंगु खँ कन । अले अन मेथाय् फोन लगे मजूसां त्वाइलेटय् छथाय् धा:सा नेटवर्क लगे जूगु जुयाच्वन । अले ला मा:सां म्वा:सां त्वाइलेटय् वना फोन यानागु खँ नं न्ह्याबलें लुमना च्वनीगु खँ ख: धका: पल्पसां कन ।
(विजयरत्न असंबरे

More Stories Like this