नेवा: संकिपा नख:या झ्वलय्

विजयरत्न असंबरे

न्हापांगु नेवा: संकिपा “सिलु” पिहां व:गु नीन्यादँ क्यंगु दँय् थन दकलय् न्हापांगु नेवा: संकिपा नख:या आयोजना जुल । केलत्वा: जनबहा:या न्ह्य:ने च्वंगु दबुलिइ छवा:यंकं जूगु उगु ज्याझ्व: हे नेपालभाषाया संकिपा ख्यलय् दकलय् न्हापांगु संकिपा नख: ख: । नेपाल सम्वत् ११३२ ञलाथ्व द्वादशी खुनुनिसें न्ह्या:गु उगु नख: ञया: ज्व:छि जूगु ख:सा ञलागा चौथि खुनु क्वचा:गु ख: । फूटबल कासाय् जक थ:गु नुग: क्वसायेका वयाच्वंगु मच्छिन्द्र क्लवया ग्वसालय् जूगु न्हूगु न्हापांगु संकिपा नख:या उलेज्या नं न्हापांगु नेवा: संकिपा ‘सिलु’ क्यना: जुल । संकिपा ख्य:या निंतिं थ्व छगू ज्व:मदुगु दसु जुयाबिल ।

फूटबल कासाय् जक नुग: क्वसायेका वयाच्वंगु मच्छिन्द्र क्लवं जनबहा: पिनेया उगु दबुलिइ न्हापा वल्र्ड कप फूटबलया नं लाइभ क्यनेज्या या:गु ख: । धात्थें धायेगु ख:सा वहे वल्र्ड कप लाइभया सफलतां नेवा: संकिपा नं अथे चकंगु सर्ग:या क्वय् क्यनेगु मति व:गु ख:सा थ्व खँ मतिइ लुइकूपिं संकिपामि आलोकसिद्धि तुलाधर, भाषाह्य:मि व म्येहालामि पवित्र कसा: अले संकिपा पत्रकार व भाषा ह्य:मि विजयरत्न असंबरे ख: । इमिगु हे कुतलं हे नेवा: संकिपा नख:या पुवाचा पिइगु ज्या जूगु ख: ।

न्हापांगु संकिपा ज्याझ्वलय् सिलु, तंबैंक, याक: म्ह्याय्, जिपिं बदमाश मखु, मिजं, तुतां थेंज्या:गु बाखं हना प्याखं (फिचर फिल्म) व योमरिया बाखं, म्याजिक अफ ह्वील्स, डोल्पाय् नापला:म्ह नेवा: थेंज्या:गु ननफिक्सन (डकुमेन्ट्री) फिल्म अले मुद्दा व थौंकन्हे थेंज्या:गु शर्ट फिल्मत नं क्यनेज्या जूगु ख: । थुकथं न्हापांगु संकिपा नख: त:जिक क्वचा:बलय् ग्वसा: खल:या नुग: चकन । अले डिभिडी, भिसिडी व च्यारिटी शोलय् जक लिकुनाच्वंगु नेवा: संकिपात उगु प:खालं पिहां वया: छगू न्हूगु स्वकुमि पुच:या दथुइ थ्यन । संकिपा धइगु स्वकुमिया निंतिं ख: धइगु खँया छगू दसु जुयाबिल ।

थुकथं न्ह्या:गु संकिपा नख:या निक्व:गु ब्वकथं ने.सं. ११३३ ञलाथ्व: द्वादशी खुनुनिसें हाकनं छक्व: संकिपा नख: न्ह्यात । वहे थाय् । वहे अवसर । तर संकिपा धा:सा मेमेगु हे । थ्व पालय् बांला: मय्जु, यलेबाथ, थ:म्हं म्हूगु गा:, न्हाय्कं, झस्का:, सर्ग:मिला, जिगु मिखाया न्ह्य:ने व इहिपा थेंज्या:गु फिचर फिल्मया नापनापं पात्र नांयागु शर्ट फिल्म अले तुइसिं, नेवा: म्यूजिक भिडियो, चिचि नं पापा नं थेंज्या:गु डकुमेन्ट्री फिल्मत क्यनेज्या जुल । मच्छिन्द्र क्लवया हे ग्वसालय् जूगु उगु निक्व:गु नेवा: संकिपा नख: दुने क्यने धका: क्व:जिउगु गुरुंमापा व मतिनाया स्वां धा:सा छुं छुं हुनिं याना: क्यने मखन ।

जनबहा: पिने जूगु थ्व निदँ तकया संकिपा नख:या विशेषता धइगु सम्बन्धित संकिपामि व स्वकुमि दथुइ ब्वलंगु छगू स्वापु ख: । अले थ्व निगू पक्ष दथुइ जूगु खँल्हाबल्हा ख: । गुलिखे संकिपा मतिनामिपिं संकिपा नख: जुया च्वंथाय् संकिपाया कलाकार व प्राविधिकत नापलाये दया: लय् नं ताल । थ: य:पिं नेवा: स्टारतलिसे च्वना: किपा नं काल । थुकें याना: स्वकुमि व संकिपामि दथुइ छगू स्वापू क्वातुल । जनबहा: पिने जूगु उगु संकिपा नखलय् संकिपा क्यनेगु झ्वलय् न्हून्हूगु नेवा: संकिपाया बारे यक्व चर्चा नं जुल । अले अन क्यंगु प्रोमो स्वया: अज्या:गु संकिपा माला: माला: स्वइपिं स्वकुमितय् ल्या अप्वया वल धइगु खनेदत ।

संकिपा नख: धइगु संकिपामितय् निंतिं छगू त:जिगु नख: ख: । थुकें संकिपाया बजा: तब्याका बिइ । संकिपायात आपालं आपा: स्वकुमिया दथुइ थ्यंका बिइ । सायद थ्वहे खँ वा: चायेका: जुइमा: गोपीकृष्ण मुभिजया टिभि फिल्मी नांयागु टेलिभिजन च्यानल नं नगुने टेलिभिजनया पर्दाय् छगू नेवा: फिल्म फेस्टिभल यातसा थुगुसी नेपालभाषाया छगूयां छगू हे जक टेलिभिजन च्यानलकथं धस्वानाच्वंगु नेपालमण्डल टिभिइ नं नेवा: फिल्म फेस्टिभल याइगु जूगु दु । थ्वहे वइगु दिल्लागा ७ (श्रावण २) शुक्रवा:निसें ने.सं. ११३५ कछलागा: ७ (कार्तिक २८) गते तकया झिंच्यावा:तक उगु नेवा: संकिपा नख: न्ह्याइगु जूगु दु ।

मुकं झिंच्यागू नेवा: संकिपा क्यनेगु ग्वसा: दुगु उगु संकिपा नखलय् ब्वति कायेत आ:तकया दुने नीन्यागू संकिपाया नां दुतिने धुंकूगु खँ ग्वसा: खल:या कजि गोविन्दमान ब्यञ्जनकारं जानकारी बिल सा थौं बुधवा:तकया दुने मेगु न्यागू ति संकिपा थपे जुइगु खनेदु । ग्वसा: खलकं संकिपाया नां दुतिनेगु ई थौंतकया तयात:गु दु । अले थथे दुतिंगु संकिपायात छगू ल्यज्या पुचलं ल्यइगु खँ नेपालमण्डल टिभीया भाइकाजी महर्जन नयनं कन । डा. पुष्पराज राजकर्णिकार, नरेशवीर शाक्य, शाक्य सुरेन, सौरभ शाक्य व विजयरत्न असंबरेपिं च्वयादीगु उगु ल्यज्या पुचलं संकिपा ल्येगु ज्या न्ह्याके धुंकूगु दु ।

छखे नेवा: संकिपाया संर्गतय् मेगु छगू संकिपा नख: खने दयेक: व:गु दुसा मेखे नगुनेनिसें संकिपा नख: न्यायेकेगु यानावयाच्वंगु मच्छिन्द्र क्वलं थुगुसी स्वक्व: खुसिया नेवा: संकिपा नख: न्यायेकेगु निंतिं मा:मा:गु तयारी न्ह्याके धुंकूगु दु । उकिया निंतिं संकिपामिपिंलिसे स्वापू तयेगुनिसें कया: मेमेगु मा:गु ज्याया तयारी सुरु जुइ धुंकल । स्वक्व:गु नेवा: संकिपा नख: ११३४ ता:लाकेया निंतिं छगू स्वतन्त्र ग्वसा: खल: हे स्वनेगु नं तयारी जुयाच्वंगु दुसा नेपालमण्डल टिभीया ग्वसालय् जुइगु संकिपा नख:या नापनापं मच्छिन्द्र क्वलया ग्वसालय् जुइगु स्वक्व:गु नेवा: संकिपा नख: ता:लाकेत ग्वाहालि जुइकथं नेपालमण्डल टिभी छगू नियमित ज्याझ्व: न्ह्याकेत्यंगु दु । उलि जक मखसें थौं सामाजिक सञ्जाल धइगु समाजया छगू त्व:फिके मज्यूगु अंग थें जुइधुंकूगुलिं याना: नेवा: फिल्म फेस्टिभल नांयागु फेशबुक पेज नं चायेके धुंकूगु दु । अले यूट्यूबय् नेवा: फिल्मया थपु जुइगु थीथी हलंज्वलं तयेगु ज्या नं शुुरु जुइ धुंकूगु दु । थ्व ज्याया निंतिं शैलेश राजभण्डारुीं नुग: क्वसायेकाच्वंगु दु । थुकिया नापनापं थुगुसी जुइगु स्वक्व:गु नेवा: संकिपा नख:या झ्वलय् निगू कथंया संकिपा कासा नं जुइगु जूगु दु । छगू कासा न्यागू मिनेट तकया फिक्शन (बाखं दुगु) शर्ट फिल्मया जुइसा मेगु चाहिं नीगू मिनेट तकया नन फिक्शन (डकुमेन्ट्री) फिल्म दथुइ जुइ । अले न्हाप ला:गु फिल्मयात २५ द्व:/२५ द्व: तकाया सिरपा: बिइगु ग्वसा: मच्छिन्द्र क्वलं यानात:गु दु । थुकथं नेवा: संकिपा नख: आ: छगू बिस्कं हे सवा: ज्वना: पिलू वये त्यंगु दु । अले थुके नेवा: संकिपा ख्य:या थपुया निंतिं ग्वाहालि याइ धइगु भलसा काये थाय् दु धका: मधासें मगा: ।

More Stories Like this