पहिचान पक्षधरतय्गु गठबन्धन

एनेकपा (माओवादी)या नेतृत्वय् संघीय लोकतान्त्रिक गठबन्धनया रुपय् संघीय समाजवादी पार्टी व प्यंगू मधेसवादी पार्टीया गठबन्धनय् घोषणा जूगु छुं दिं लिपा हे आ: वइगु शनिवा: पहिचान पक्षधरतय्गु मेगु गठबन्धनया घोषणा जुइगु जूगु दु । थुगु गठबन्धनय् नेपा: राष्ट्रिय पार्टी, आदिवासी जनजाति पार्टी, खम्बुवान राष्ट्रिय मोर्चा, थरुहट तराई पार्टी नेपाल, राष्ट्रिय जनमुक्ति पार्टी, सामाजिक लोकतान्त्रिक पार्टी, संघीय लोकतान्त्रिक पार्टी, संघीय लोकतान्त्रिक राष्ट्रिय मञ्च सम्बद्ध संघीय लिम्बूवान राज्य परिषद् दुथ्यानाच्वंगु दु । गठबन्धनया नां पहिचानय् आधारित संघीय गठबन्धन धका: त:गु दु ।
थुकथंया गतिविधिं याना: नेपालय् लोकतन्त्रया व साम्यवादीया राजनीतिया पलेसा पहिचानया राजनीति सुरु जूगु विश्लेषण मनूतसें यानाह:गु दु । सत्तारुढ दलत म्हिग:या पंचायत थें जूगु दु धा:सा म्हिग:या कांग्रेस, माले, मसाल, मशाल, मानन्धर पुच:, तुल्सीलाल पुच:, जनवादी मोर्चा धइथें जूगु दु । फरक थुलि हे ख: कि उबलय् दलत प्रतिबन्धित धा:सा आ: खुल्ला ।
तर आ:या मूलभूत सवाल धइगु संविधान वये न्ह्य: हे आन्दोलन न्ह्याका: संघीय लोकतान्त्रिक गणतन्त्र नेपालया संविधानय् पहिचान दुगु संघीयता सुनिश्चित यायेगु हे ख: । थुकथंया खँ सुनिश्चित यायेगु निंतिं आन्दोलनया विकल्प मदयेधुंकूगु दु । थुकथंया अवस्थाय् घोषित गठबन्धनतसें तत्काल आन्दोलनया घोषणा याना: न्ह्यायेमा:गु खनेदु ।
२०५१ सालय् जनयुद्ध न्ह्याकूगु इलय् नं आपा: कम्यूनिष्ट पार्टीतसें थ्व सफल जुइगु ज्या हे मखु सशस्त्र क्रान्ति यायेगु निंतिं नेपालय् वस्तुगत व मनोगत आधार दहे मदु धका: धयाच्वंगु ख: । तर माओवादीतसें थ:गु हे बल व बुद्धिं झिदँतकया जनयुद्ध न्ह्याकल । आ: उकथं हे कठिन श्रम व खतरा मोले यायेमा:गु मखुसां ‘पहिचान वइ मखुत’ धइगु निराशापूर्ण भावना व मनस्थितियात तछ्याना: आन्दोलन न्ह्याकेमा:गु स्थिति पिदंगु दु ।
संघीयताविरोधीतय्गु हल्लाया हुनिं पहिचानपक्षधरतय्त थाकुया च्वंगु छगू परिस्थिति ख:सा नेपा:या राजनीतिइ पहिचान छगू मुद्दा जक मखसें राजनीति यायेगु आधारया रुपय् विकास जुइधुंकूगु धा:सा अनुकूलता नं ख: ।
न्हापांगु संविधानसभाय् पहिचान पक्षधरतय्गु स्वब्वय् निब्व बहुमत खा:गु धका: धा:सां थुपिं वास्तवय् माओवादी व कांग्रेस, एमालेया जनजाति सभासद्त ख: । थुपिं पहिचानया हे आधारय् राजनीति याना वयाच्वंपिं मखु । उकी पहिचान हे धका: व:पिं ला मधेशवादी दल व नेपा: राष्ट्रिय पार्टी थुज्व:गु चीधंगु दल जक दु । आ: पहिचानया पं लीपिं व मलीपिं निगू स्पष्ट ध्रुवीकरण जूगु दु । अथेजूगुलिं पहिचान हे धका: धइपिं ला राजनीतिक रुपं निगूगु संविधानसभाया चुनावय् तिनि खनेदुगु ख: । न्हापांगु संविधानसभां उकिया निंतिं पूर्वाधार जक तयार यात । अथेजूगुलिं न्हापा पहिचान पक्षधरतय्गु दथुइ नं अनेक दृष्टिकोण, आधार, संगठन, विभाजन, एकता आदिया प्रक्रिया जुइगु स्वाभाविक खँ ख: । थुकिया झ्वलय् छगू बांला:गु व न्ह्यथनेबह:गु पला:या रुपय् पहिचान पक्षधरतय्गु गठबन्धन तयार जूगु यात काये हे मा: ।
नेपालय् लोकतन्त्र स्थापना जुइधुंकूगु, साम्यवादी दलत नं पूँजीवादी गणतन्त्रया पक्षय् अग्रसर जूगु थुगु इलय् नेपा:या राजनीतिइ पहिचानया आधार धइगु वास्तविक रुपय ऐतिहासिक आवश्यकतां हे ब्वलंकूगु खँ ख: । सत्तारुढ दलतसें आर्थिक क्रान्ति व कृषि क्रान्तिया नारा बिया वयाच्वंगु जूसां सत्तारुढ वृत्तं पिने ला:पिं व बेदखलीइ लानाच्वंपिं मनूतय्गु राजनीति यायेगु आधार धइगु आ: पहिचान हे जूगु दु । थुकथंया प्रक्रिया आ: नेपालय् पहिचानया राजनीतिया सूत्रपात जूगु जक मखु, थ्व न्ह्या: वनीगु विषयवस्तु नं ख: धइगु खँ खनेदयाव:गु दु ।
तर सकलें पहिचान पक्षधरतसें ल्व:मंके मज्यूगु खँ छु दु धायेबलय् आ: हे आन्दोलन तच्वयेका: आ: दयेकीगु संविधानय् हे पहिचान खुले जूगु प्रदेशया नां तयेके फयेमा: । गठबन्धनया तत्कालीन उद्देश्य नं वहे जुइमा: । २०६४ सालय् न्ह्या:गु मधेशवादी आन्दोलनया रापं हे नेपा:या अन्तरिम संविधानय् संघीयता धइगु खँग्व: तयेकेफुगु ख: । जनजातितसें नं २०६९ जेठय् स्वन्हुयंक नेपा: बन्द याना: सरकारयात क्व:छुकूगु ख: । तर थुकी निरन्तरता बी मफुत । जनजातितसें यात धा:सा यायेमफुगु खँ मखु । झीपिं जागृत ख:, तर संगठित जुया: संगठित व सशक्त अभिव्यक्ति बीगु ज्याय् धा:सा ल्यूने लानाच्वन । आ: अथें च्वना च्वने मज्यू ।
गठबन्धनया राजनीतिया लिच्व: थ्वहे जुइमाल कि थुकिं आन्दोलनया निंतिं वस्तुगत व मनोगत परिस्थिति तयार यायेमाल । थ्व ज्या नं स्वयम् आन्दोलन न्ह्याका: हे जक जुइफइ । आन्दोलन निम्ह हे जक दुसां यायेमाल, प्यम्ह हे दुसां यायेमाल ।
पूर्वया लिम्बूवाननिसें कया: पश्चिम तराईया थारुवानतक थुकी दुथ्यानाच्वंगु दु । नापं नेवा:तय्गु नेपा: राष्ट्रिय पार्टी नं थुकी दु । एमएस थापा मग:या राष्ट्रिय जनमुक्ति पार्टी, कांग्रेस त्व:ता: थ:पिनि सामाजिक लोकतान्त्रिक पार्टी नं थुकी दुथ्यानाच्वंगु दु । तर ताम्सालिङ सम्बद्ध दल धा:सा गुगुं मदु । मञ्च सम्बद्ध संघीय लिम्बूवान राज्य परिषद् थुपालय्या चुनाव बहिष्कार या:गु पार्टी ख: । थुकी विविधता दु, तर अझ नं क:घाना: न्ह्या: वनेमा:गु नं खनेदु ।

More Stories Like this