संघर्ष बाहेक मेगु लँपु मदु : तुलाधर

नेवाः स्वायत्त राज्य मंकाः संघर्ष समितिं थौं नेपाः ब्याङ्क्वेट, खुसिबुँइ ग्वसाःग्वःगु येँ महानगर पहिचान पक्षधर न्ह्यलुवा कार्यकर्ता भेलायात सम्बोधन यानादिसें मानवअधिकारवादी नेता पद्मरत्न तुलाधरं आदिवासी जनजातिपिनिगु थःगु हक व अधिकारया निंतिं फुक्कं लँ बन्द जुइधुंकूगुलिं सतक संघर्ष बाहेक मेगु विकल्प मदुगु विचाः प्वंकादिल ।

वय्कलं वंगु इलय् राजनीतिक पार्टीपिसं न्ह्याकूगृु प्रजातान्त्रिक आन्दोलन सकल नेपाःमि जनताया लागि मुक्तिया आन्दोलन जुइगु विश्वासं थः उकि ह्वब्वानागु धयादिसें ०४६ सालया जनआन्दोलन, २०६२÷६३ या आन्दोलन व थ्वयां न्ह्यःया सकतां आन्दोलनय् ब्वति काःगु जूसां नं थ्व फुक्कं आन्दोलनं आदिवासी अधिकार आःतक नं काये मफुगु धइगु दुर्भाग्यपूर्ण जूगु धयादिसें राजनीतिक पार्टीया नेतापिं सुनां थःगु जीवन जीवन संघर्षय् छ्यात उज्वःपिं नेतापिसं तकं आदिवासीया उत्पीडनयात थुइके मफुगुलिं दुःख व्यक्त यासें आःया आन्दोलन आदिवासी जनजातिया आन्दोलन जूगुलिं उगु आन्दोलनपाखें हे फुक्कं शक्तियात क्वछुइकाः त्वःतेगु प्रतिबद्धता तकं व्यक्त यानादिल ।

लिसें प्रजातान्त्रिक नेता व वामपन्थी नेतापिसं प्रजातन्त्र व लोकतन्त्र धुंकाः सकल जनता समान जुइ धइगु नारा नाराय् हे जक सिमित जूगु धासें थः सकसिनं ग्वाहालि व अधिकारया निंतिं सतकय् वयेत तयार जूसा थम्हं उकिया नेतृत्व यायेत तायार दुगु खँ कनादिल ।

ज्याझ्वलय् जनकवि दुर्गालाल श्रेष्ठं थः जनकवि, कवि मखु, थ्व जनताया मिखाय् खः । वास्तवय् थः आदिवासी जनजातिपिनिगु मुक्तिया निंतिं मदिक्क ल्वानाच्वनाम्ह छम्ह सामान्य संघर्षया सिपाहिँ जक जूगु बिचाः प्वंकादिसें अधिकार सुनिश्चितताया नितिं मेपिंत त्याके स्वयां न्ह्यः थःत हे त्याकेमाःगु बिचाः प्वंकादिल ।

वय्कलं जनजाति आन्दोलनया उत्थानया इलय् च्वयादीगु कविता तकं ब्वनाः न्यंकादिल ।

ज्याझ्वलय् मेम्ह न्वचुमि नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं अधिकार प्राप्तिया निंतिं आःया लँ संघर्ष बाहेक मेगु छुं मदुगु धयादिसें जनताया संघर्षपाखें निरंकुश पंचायत व्यवस्था वन, थःतः तःधं तायेकाच्वंगु राजतन्त्र वन, थ्वहे जनताया शक्तिपाखें पहिचानविरोधीत नं क्वदःलीगु विश्वास सकसिनं यायेमाःगु धयादिसें पहिचानपक्षधरपिन्त विखण्डनकारी धाइपिं वास्तवय् विखण्डनकारी मखु धकाः स्यूसां नं अधिकार बी माली धकाः याःगु दुष्प्रचार जक जूगु खँ कनादिल ।
संघर्ष समितिया नायः लिसें ज्याझ्वःया सभापति सुजीव बज्राचार्यं पहिचान पक्षधर आन्दोलन तेज दयेकाः येँ महानगर पालिकाया थीथी वडाय् नेवाः प्रदेश जागरण अभियान न्ह्याकेगु धयादिसें उगु अभियान ३५ गुलिं वडाय् क्वचायेके धुंकाः येँयापिनिगु शक्ति प्रदर्शन यायेगु बिचाः प्वंकादिल । लिसें थीथी वडाय् जुइगु वडा भेलाया जानकारी उगु ज्याझ्वलय् बियादिल ।

संघर्ष समितिया दुजः मचाराजा महर्जनं न्ह्याकादीगु ज्याझ्वलय् सुभाय् समितिया दुजः सानुकाजी महर्जनं देछानादीगु खः ।