राजनीतिक क्रान्ती पूवंगु मदुनि : मल्ल के सुल्दर
नेवाः स्वायत राज्य मंका संघर्ष समितिया सचिवालय् कजि मल्ल के सुन्दरं राजनीतिक क्रान्ती पूवंगु मदुगू खँ कनादिगु दु । सनिवाः २७ वडा येँ ध्वाखा बहाल जुगू त्वाः मुना ज्याझ्वलय् अथें धायादिगु खः ।
उगु ज्याझ्वलय् मल्लं राजनीतिक पार्टीतय्सं थुगू इलय् राजनीतिक क्रान्ती पूवने धुंकूगु खँ धयाच्वंगु आः आर्थिक क्रान्ती यायेमाःगु खँ धयाच्वंगु दु । बास्तबय् नेवाः नापं मधेसी, मिसा, दलित, आदिवासी जनजातीया निंतिं धाःसा राजनीतिक क्रान्ती पूवंगु मदुगू खँ कनादिल । नेवाः भाय् ल्हायेगु व आदीवासी जनजातीं थःगु मातृ भासा ल्हायेगु आधिकार तक मवंगु इलय् गु कथं क्रान्ती पूवन धंकाः न्ह्य तयादिल । थःगु भासा संस्कृति पहिचानया निंतिं थुगू इलय् क्रान्ती व आन्दोलन यायेमाःगु अवस्था दु थुकिया निंतिं संकल पहिचान पक्षधर छधि छप्पं जुया सघर्ष यायेमाःगु खँ तयादिल ।
ज्याझ्वःया मुँ तातुना पहिचान दुथ्याःगु संविधान व पहिचान विरोधीतय्तं होसीयार यायेगु निंतिं उगु ज्याझ्वः जुगू खः । नापं पहिचान विरोधीतय्तं खवरदारी यायेत संकेतिक विरोध कथं त्वाः त्वाःलय् हाकुगु ध्वँया ब्वकेगु ज्या तक जुगू खः । ज्याझ्वः नेवाः स्वायत राज्य मंका संघर्ष समितिया ग्वसालय् जुगू खः ।
