बाबुरामयात मंकाः संघर्ष समितिं ज्ञापन पौ
नेवाः स्वायत्त राज्य मंकाः संघर्ष समितिं वंगु मंगलवाः संवैधानिक, राजनीतिक संवाद तथा सहमति समितिया सभापति डा. बाबुराम भट्टराईयात नाप लानाः ज्ञापनपत्र लःल्हाःगु दु । संघर्ष समितिं पहिचानसहितया संघीयताया निंतिं व नेवाः आदिभूमि नेवाः प्रदेश न्हूगु संविधानपाखें पलिस्था यायेगु निंतिं यानावयाच्वंगु थीथी संघर्षयात कयाः उगु इलय् सभापति भट्टराईयात जानकारी ब्यूगु खः ।
संघर्ष समितिया नायः सुजीव बज्राचार्यं लःल्हाःगु उगु ज्ञापन पतिइ नेवाःतय्गु ऐतिहासिक, भाषिक व सांस्कृतिक पहिचानसहितया स्वशासित स्वायत्त राज्य सुनिश्चित यायेमाःगु, सीमांकनया सवालय् प्राचीन नेपालमण्डलया ऐतिहासिक भूभाग दुने नेवाः बाहुल्यता दुगु लागा सकतां कःघाये माःगु, जनघनत्वकथं उकियात व्यवस्थापन यायेत आवश्यक कथं भूभाग व प्राकृतिक स्रोत साधन दुथ्याकाः सीमांकन यायेमाःगु, नेवाः बाहुल्यतासहितया निरन्तरता जूगु प्रशासनिक इकाइ विभाजन यायेमज्यूगु लिसें थीथी खँत न्ह्यथनातःगु दु ।
उगु ज्ञापन पत्र लःल्हानाकासें समितिया सभापति डा. बाबुराम भट्टराई नं न्हूगु संविधान पितबीगु निंतिं न्यूनतम सहमतिया विन्दु मालेगु ज्या जुयाच्वंगु खँ कनादिसें थःपिं व थःगु पार्टीं पहिचानसहितया संघीयताया मुद्दायात गुबलें मत्वःतेगु खँ नं कनादीगु खः । वय्कलं समितियात संघर्ष समितिपाखें वःगु थुगु ज्ञापनपत्रयात कयाः दुजःपिनि दथुइ सहलह यायेगु खँ कनादिल ।
ज्ञापनपत्र लःल्हायेगु ज्याझ्वलय् संघर्ष समितिया सचिवालय कजि मल्ल के. सुन्दर, सल्लाहकार राजेन्द्र श्रेष्ठयालिसें समितिया थीथी घटकया पदाधिकारीपिं उपस्थित जुयादीगु खः ।
