जागरण अभियान न्ह्यात

पहिचानया मुद्दायात क्व:थला छ्वयेगु नेपा:या शासनसत्ताय् थ्या:पिं बम्र्हुवादीतय्गु षडयन्त्रयात हाथ्या विसें शनिवा: निसें नेवा: प्रदेशया नितिं जागरण अभियान न्ह्या:गु दु । थुगु जागरण अभियान मुक्कं जागरण अभियान जक मखु, वरुकंछि उखुन्हु चीहायेक जूसां ‘पहिचाान विरोधी होशियार †’ धका: प्लेकार्ड नापं तया: हाकुगु ध्वाँय् नं ब्वयेकल ।
नेवा:तय्गु नितिं थ:पिनि पुर्खां तया थकूगु अपार सम्पदाया गौरव गठन यानाच्वनेगु ई मखयेधुंकल । उगु गौरव नं आ: नेवा: लातां स्व:थें स्वस्वखंक मेपिसं छ्यला: नइगु स्थिति पिहां वयेधुंकल । थ:गु आदिभुमिइ हे नेवा:त ३० प्रतिशत जक ल्याखय् लाये धुंकल । येँ जिल्लाया सवाल जक स्वयेगु ख:सा वंगु मंसिर ४ गते जुगू संविधान सभाय् येँ जिल्ला दुने प्यंगु सिटय् जक नेवा:त त्यात । व नं नेवा: हे धइपिं ला छम्ह हे त्या:गु मखु । लँय् जुल धा:सा म्हस्यू ख्वा:पा: हे खने मदये धुंकल । नेवा:त थ:गु हे आदिभुमिइ शरणार्थी थुज्व:गु हालतय् थ्यने धुंकल ।
थुकथं स्वनिग: दुने स्पष्ट नेवा:तय्गु अस्तित्व व पहिचानय् हाथ्या जूवंगु दु । थुकिं नेवा:तय् आर्थिक, राजनीतिक, सामाजिक हैसियत नं झन्झन् हे कुहां वनाच्वंगु संकेत नं ब्यूगु दु ।
थ्वहे इलय् थ:गु अस्तित्व व पहिचानया नितिं नेवा: प्रदेशया माग याना: न्ह्या:वंपिं नेवा:तय्त वंगु संविधानसभाया चुनावलिपा ‘पहिचान पक्षधरत बुत’ धका: हल्ला न्यंका: पराजित मनस्थितिइ थ्यंकेगु ज्या यात । थुकथंया अवस्था दयाच्वन धा:सा ला नेवा:त स्वयं हे पलायन जुयावनीगु परिस्थिति नं पिमदनी धका: धायेथाकु । थ्वहे खँयात वा:चायेका: नेवा: स्वायत्त राज्य मंका: संघर्ष समितिं ‘नेवा: प्रदेश जागरण अभियान’ न्ह्याकूगु ख: ।
शनिवा: चीहाक:गु जुलुस पिथना: ध्वाँय् ब्वयेका: वनेन्ह्य: असं तक्षबहालय् छगू जागरण सभा जुल । उगु सभाय् न्ववासें नेवा: स्वायत्त राज्य मंका: संघर्ष समितिया सल्लाहकार भाजु महेशनमान श्रेष्ठं आ: संघर्षया लँपु लीगु बाहेक मेगु लँपु मदु धइगु खँ कनादिल । स्वनिगलय् नेवा:तय्गु भूमि अतिक्रमण जुयाच्वंगु, लँ तब्या: यायेगु त्वहलय् आदिवासीतय्त विस्थापित या:गु आदि खँ वय्कलं न्ह्यथनादिल ।
उगु हे ज्याझ्वलय् न्ववासें नेवा: राष्ट्रिय मुक्ति मोर्चाया नाय: पवनमान श्रेष्ठं नेवा:तय्गु माग स्वायत्त राज्य व स्वशासन हे ख:गु जूसां वंगु संविधानसभाया राज्य पुनर्संरचना व राज्यशक्तिया बाँडफाँड समितिं थातथलोया पहिचान जुइगुकथं प्रदेशया नामाकरण जक जातिया नामं या:गु व ल्यूने लायेधुंकूगु उत्पीडित जाति जूगुलिं न्ह्य:ने हयेत निगू अवधितक मुख्यमन्त्री वहे आदिवासीपाखें जुइगु व्यवस्था या:गु खँ न्ह्यथनादिल । थ्व गुगुं जातीय राज्य मखु, तर देय्या प्रतिक्रियावादी बम्र्हूवादीतसें थुकियात जातीय राज्य धका: भ्रम न्यंकल, गुकियात चिरे याये मफुत । थुकथं थातथलोयात मान्यता दइगु कथं पहिचानयात तकं स्वीकार मयायेगु धइगु बम्र्हूवादीतय्गु क्वह्यंगु ज्या ख: ।
वय्कल धयादिल – संविधानसभाय् पहिचान पक्षधरतय्गु ल्या: धइगु तसकं म्हो जक दु अन दुने संघर्ष याना: नेवा: प्रदेश वइगु संभाव मदु । अथे नं सतक संघर्ष सहितया आन्दोलन छगू हे जक लँपु ख: । अझ नं आन्दोनलयात तेज यायेफत धा:सा नेवा: प्रदेश हयेगु खँ असम्भव हे थ्यंक मखु ।
न्हापांगु संविधानसभाय् प्रक्रियाय् यंकूगु ख:सा स्वब्वय् निब्व बहुमतं पारित जुया: नेवा: प्रदेशसहितया संघीयता वयेधुंकूगु ख:, तर सहमति यायेगु नामं जूगु षडयन्त्रय् थ:नापं दुथ्यानाच्वंगु एमाओवादीया नेतात नं सामेल जुल । थुकथं नेतातसें धोखा बीगु प्रवृत्ति दहे दु । थ्व प्रवृत्ति ड्यास माओवादी दुने आ:तक खास रुपं मदु, तर छुं गथे जुया: जनताया आन्दोलनयात धोखा बीगु ज्या जुल धा:सा थ:पिसं व्यवहारय् हे विद्रोह याना: क्यनेगु खँ वय्कलं धयादिल ।
पहिचानया पक्षय् संघर्ष तेज यायेत सकलें आदिवासी जनजाति छप्पँ जुइमा:गु नापं वर्गीय उत्पीडनय् ला:पिं बम्र्हूक्षेत्रीतय्त नं नापं यंके फयेमा:गु खँ कुलादिल । आखिर बम्र्हू नामं शासक शोषक जुयाच्वंपिं धइपिं ५ प्रतिशत नं मदुगु खँ वय्कलं कुलादिल ।
उगु हे ज्याझ्वलय् सभापतिया थासं न्ववासें नेवा: स्वायत्त राज्य मंका: संघर्ष समितिया नाय: मनरत्न शाक्यं नेवा: प्रदेश वइमखुत धइगु निराशावादी खँ ल्हाना जुइमज्यू, थ्व ला झीगु संघर्षं निर्धारित याइगु खँ ख: धका: धयादिल ।
संविधानसभा दुने पहिचान पक्षधरतय्गु ल्या: म्हो जूगु थुगु इलय् संघर्ष बाहेक मेगु लँपु मदुगु खँ नं वय्कलं धयादिल ।
नेवा: जागरण मञ्चया नाय: सुजिब बज्राचार्यं उगु ज्याझ्वलय् नेवा: प्रदेश जागरण अभियान आ: त्वा:त्वाल् न्हयाका यंकेगु व थ्वहे झ्वलय् नेवा: प्रदेश स्वयंसेवक पुच: दयेका: ५०० म्ह स्वयंसेवक दयेकेगु योजना दुगु खँ कनादिल ।
वंगु संविधान चुनावलिपा नेवा:तय्गु दथुई पहिचानया मुद्दाया खँय् निराशावादी भावना पिदना च्वंगुली थुगु जागरण अभियानं न्हूगु जागृति पिथना व्यूगु सकसिनं वा चायेकूगु दु । उगु ज्याझ्व: जुयाच्वंगु इलय्हे वडा नं १७, २० व २७ पाखें थुकथंया हे ज्याझ्व: थ:पिन्थाय् नं यायेगु प्रस्ताव न्ह्य:ने ह:गु ख: ।

More Stories Like this