दबू प्याखनं संकिपा ख्यलय्तक थ्यंम्ह पवन जोशी

वि.सं. २०२७ सालय् झिंप्यदँया उमेरय् ‘हकदार’ नांयागु दबू प्याखं म्हितूम्ह पवन जोशी थौं नेपालभाषा संकिपा ख्य:या छम्ह नांजा:म्ह संकिपामिया रपय् थ:गु न्हाय् धस्वाका वयाच्वंम्ह व्यक्तित्व ख: । झिंप्यदँया वैंशय् हे दबू प्याखनय् भिलेन जुया: म्हितूबलय् वयागु अभिनय खना: तंपिका:पिं यक्व हे दुगु खँ पवन जोशीयात आ:तक न्ह्याबलें लुमना वया च्वनीगु खँ जुयाच्वन । अथे धइगु वय्क:या निंतिं थ्व छगू अविस्मरणीय घटना जुयाबिल । उगु इलय् येँया: ज्व:छि त्वा:त्वालय्, गामय् शहरय् दबू प्याखं क्यनेगु चलन दु । अले अज्या:गु प्याखं क्यनेगु झ्वलय् ‘हकदार’ नांयागु उगु दबू प्याखं येँया लगं त्वालय् नं क्यंगु जुयाच्वन । प्याखं क्वचायेका: प्याखनय् ब्वति का:पिं सकसित नके त्वंके यानाच्वंगु इलय् लैका जूवम्ह छम्ह मिसां थ्व ला मिस्त स्यंका जुइम्ह मभिंम्ह मिजं धका: वयात ला हे तया मब्यू हँ । उलि जक मखसे अन छम्ह अय्ला: त्वना: का:म्ह छम्ह मनुखं ला व मनू पिहां वल कि त्वाना: हे त्वथुला बी धका: पिया च्वन हँ । छाय्धा:सां व मनुखं पवन जोशीयात ‘हकदार’ नांयागु दबू प्याखंया मभिंम्ह पात्रया रुपय् काल खनिं ।
थुकथं छम्ह मभिंम्ह पात्रया रुपय् थ:गु अभिनय यात्रा न्ह्याकूम्ह पवन जोशीं लिपा नं आपालं फिल्मय् भिलेन जुया: म्हितल । किपुलिइ जन्म जूम्ह पवन जोशीं अनया मंगल प्राथमिक विद्यालयस स्वंगू क्लासतक ब्वन सा अनं लिपा येँया बसन्तपुलिइ च्वंगु नव आदर्श माध्यमिक विद्यालयस झिगू क्लासतक ब्वन । तर एस.एल.सी धा:सा यलया लगनखेलय् च्वंगु नमूना मछिन्द्रं बिल । अनंलिपा ताहाचलया महेन्द्ररत्न कलेजय् आर्य एड. यात । थुकथं थ:गु पला: न्ह्याकूम्ह पवन जोशीयात कला ख्यलय् वनेत ह:पा: बिउम्ह वय्क:भाजुया मां हे जुयाच्वन । पवन जोशीया त:धिक:म्ह दाजु जितानन्द जोशीया दजगा: धइगु ज्योतिष विद्या ख: तर अथेजूसां इमि मांया कला ख्य:पाखे नुग: क्वसागुलिं याना: दबू प्याखंया निर्देशक जुया: नं ज्या यात । माहिलाम्ह दाजु दुर्गा जोशी, साहिंलाम्ह दाजु गुण जोशी ला दबू प्याखनय् हिरोइन जुया: म्हितीपिं जुल । पुलांगु नेवा: भिडियो फिल्म ‘चरित्र’या नविन जोशी वहे दुर्गा जोशीया काय् ख: । नविन जोशी थौंकन्हय् च्यानल नेपालय् पिहां वयाच्वंगु नेवा: ज्याझ्व:या हामा ख: अले छम्ह नांजा:म्ह क्यामेरापर्सन नं ख: ।
थ्व चरित्र फिल्मया निर्देशक नं पवन जोशी हे ख: । अले थुकिया च्वमि गोविन्द चिकंमू ख: । गोविन्द चिकंमू धइम्ह उगु इलय् दबू प्याखं ख्यलय् तसकं नांजा:म्ह ख:सा ‘चरित्र’ नं वय्कलं हे दयेकादीगु दबू प्याखं ख: । वि.सं. २०२९ सालय् क्यंगु थ्व दबू प्याखं लिपा वना २०४४ सालय् नेवा: भिडियो फिल्मया रुपय् पिहां वल । अले थनंनिसें हे पवन जोशीया यात्रा फिल्म लाइनपाखे न्ह्यात । फिल्म लाइनपाखें थ:गु पला: न्ह्याके सिबें न्हापा पवन जोशी थ्यंमथ्यं सच्छिगु व नीन्यागू नाटक, ख्याल: व दबू प्याखनय् ज्या यात । थुकी मध्ये दक्व थ:म्हं हे निर्देशन यात । गुलिं प्याखनय् अभिनय नं यात । वय्कलं पद्मरत्न तुलाधरनिसें कया: आपालं आपा: च्वमिपिनिगु ख्याल:, नाटक, प्याखं स्न । थथे प्याखं स्यनीम्ह जुइ न्ह्य: पवन जोशीं छम्ह अभिनेताया रुपय् पला: न्ह्याकूगु ख: ।
न्हापां त्वा: त्वालय् दबू प्याखं क्नये हइबलय् वय्क: भाजुया नं दबू प्याखं स्वये य: । अज्या:गु हे प्याखं मध्ये ‘म्ह्याय्मचा’ नांयागु दबू प्याखं स्वया: तसकं प्रभावित जुल । अले थ: नं प्याखनय् म्हिते धका: नुगलय् तल । थज्या:गु दबू प्याखं दयेकीगु इलय् त्वा:त्वालय् वना: कलाकार ल्य: वइगु चलन दुगु जुयाच्वन । छन्हु इमिगु किपुलिइ नं वइगु जुल । व नं मेपिं ला ? नांजा:म्ह प्याखंम्व: गोविन्द चिकंमू । पवन जोशीं पुलांगु खँ लुमंकुसें धाल, “जित: आ:तक हे लुमं । गोविन्द चिकंमू वया किपूया दबूचा धइथाय् च्वन । कलाकार ल्यज्या यात । जिपिं स्वीम्ह स्वीन्याम्ह ति हे दु । उकी मध्ये जित: नं ल्यल ।”
उगु ईया छगू अडिसन ख: व । छगूकथंया स्कृन टेष्ट ख: व । उगु टेष्टय् पवन जोशीया नापनापं किपुलिं भूवन बज्राचार्य, पूर्ण बज्राचार्य, पुष्प बज्राचार्य, खड्गमान महर्जन नांयापिं कलाकारत नं ल्यज्याय् ता:ला:गु ख: । पवन जोशीं कन ।
‘जिगु ज्यान त:धंगुलिं जित: भिलेनया रोल बिल ।’ धका: धासें पवन जोशीं उगु इलय् “हकदार” नांयागु दबू तसकं लोकंह्वा:गु खँ नं कन । सच्छिसिबें अप्व: थासय् क्यंगु ‘हकदार’ धुंका: पवन जोशीं किपुयाम्ह हे शुभशान्ति बज्राचार्य पासाकया: थ:म्हेसिनं हे प्याखं दयेकेगु शुरु यात । शुभशान्तिं प्याखं च्वइगु । पवन जोशीं स्यनीगु । इमिगु जोडी नं तसकं नांजा: अन ।
प्याखं, दबू प्याखं, ख्याल:या हलिमय् थ:गु पला: क्वातुके धुंकूम्ह पवन जोशीं “चरित्र”यात नेवा: भिडियो फिल्म दयेकल । थ्व नं आपासिनं यय्कल । वय्क: भाजुं दयेकूगु “मनू मखुम्ह मनू” नांयागु छगू भिडियो फिल्म धा:सा पिहां वये मफुत । खस नेपाली भाय्या “जीवन यात्रा” नांयागु भिडियो फिल्म तकं निर्देशन या:म्ह पवन जोशी थ: नं छम्ह एक्टर ख: । तर अय्सांतबि नं थ:म्हेसिनं निर्देशन याइगु फिल्मय् अभिनय याइमखुम्ह ख: । छाय् ले ?
“छाय्धा:सां डाइरेक्सन यायेगु धइगु चानचुन खँ मखु । डाइरेक्टरया ब्वहलय् छगू मुकं फिल्मया जिम्मेवारी लानाच्वंगु दइ । अले व जिम्मेवारी जिं बांलाक्क पूवंकेमा: । उकिं जि थ:म्हेसिनं डाइरेक्सन यायेबलय् अभियन यायेगु मयाना ।” धका: पवन जोशीं लिस: बिल ।
“चरित्र”, “जीवन यात्रा” धुंका: नीदँ लिपा तिनि बांला:मय्जु ज्वना: हाकनं फिल्म डाइरेक्सनय् थ:गु ख्वा: क्यंव:म्ह पवन जोशी थ्व दथुया इलय् मेमेगु लजगाय् लगे जुल । नेपालय् तसकं म्हो जक कलर ल्याबत दुगु इलय् नेपालय् फोटो छापे याइगु कलर ल्याब जोशी कलर ल्याब चायेकल । अले उकी लगे जुल । व धुंका: किपुलिइ कीर्तिपुर बहुउद्देश्यीय सहकारी संस्था चायेकल । कोषाध्यक्ष अले उपाध्यक्ष तक जुया: ज्या यात । वय्क: भाजुया कालिमातिइ पवन स्टूडियो नांयागु छगू फोटो स्टूडियो नं दु । प्रविधि व:गु ह्यूपा:कथं आ: फोटो रीलय् मखु डिजिटलय् हिले धुंकूगुलिं वय्क: भाजुं नं थ:गु स्टूडियोयात पवन डिजिटल स्टूडियो दयेकल ।
थ्व स्टूडियो विशेष याना: वय्क:या जहान रञ्जना जोशीं स्वयाच्वंगु दु । वय्क: मय्जुयात न्हापांम्ह नेवा: मिसा फोटोग्राफर धका: नं धाइ । वय्क: भाजुया निम्ह काय्पिं दु – प्रंविन व रविन । निम्हं फोटोग्राफी नुग: क्वसा:पिं ख:सां क्रिकेट कासाप्रति इमिगु तसकं हे नुग: क्वसा: । थुकथं फोटोग्राफी व फिल्म ख्यलय् थ:गु जीवन हे पाना वयाच्वंम्ह पवन जोशीयात “बांला: मय्जु” फिल्मया निंतिं नेपाल सरकार, राष्ट्रिय चलचित्र पुरस्कार २०६७ स बेष्ट डाइरेक्टरया सिरपा: व:गु खँ नं थनथाय् लुमंके बह:जू ।

More Stories Like this