एमाओवादीं पहिचानया मुद्दा त्व:तूगु हे ख:ला ?

आत्मनिर्णयया अधिकार सहितया थीथी जातिय स्वायत्त राज्यया वकालत यानावयाच्वंगु एमाओवादी दुने पहिचानया नितिं प्रदेशया नां तयेगु खँय् जातिया नांया झलक वइगुकथं तयेत तकं अलमल जूगु दु । कांग्रेस व एमालेयात संघीयता विरोधी धका: सिधयेकेगु रणनीति का:पिं माओवादीतसें ‘जातिय राज्य’ धका: धइगु कांग्रेस व एमाले न्ह्याकूगु प्रपोगान्डा मुद्दाय् परास्त जुसेंलि थुगु स्थिति पिदंगु ख: । अथेहे पहिचानयात ‘एकल जातिय’ धका: धासें ‘बहुपहिचान’ धइगु खँग्व: हया: या:गु प्रोपोगाण्डा वारं नं एमाओवादी धरमर जूगु खनेदत ।
तर थुकिया घाटा धा:सा स्वायत्त राज्यया आकांक्षा ज्वना जूपिं आदिवासी जनजाति जनतायात लाइगु खनेदुगु दु । वंगु संविधान सभाया राज्य पुर्नसंरचना व राज्य शक्तिया बाँडफाँड समितिं पहिचानया न्यागू आधार व सामथ्र्यया प्यंगू आधार धका: दयेका: १४ गू प्रदेशया नां प्रस्ताव या:गु ख: ।
थुकी पहिचानया न्यागू आधारय् जातीय/ समुदायगत धइगु न्हापांगु आधारयात हे प्राथमिकता ब्यूगु ख: । तर आ: एमाओवादी नेता डा. बाबुराम भट्टराईं नं सांस्कृतिक, भौगोलिक, ऐतिहासिक आदि पहिचानय् वनेगु संकेत बिया: न्ववात । वय्क:या धापूकथं आ: नेवा: प्रदेशया थासय् वागमती प्रदेश, पशुपति प्रदेश, स्वयम्भु प्रदेश थुज्व:गु नां जुइगु खनेदत । थथे धया: वय्कलं जाति व जातिय खँ ख हे मखु धका: धया: थ:त लगे जूगु जातिय जूगुया विरोधीतय्गु बिल्ला चीकेत स्व:गु खनेदत । तर थथे चीकूबलय् थ:पिं हे विचलन जूगु व स्लिप न:गु नं खनेदत ।
थुकथं हे एमाओवादी नाय: प्रचण्डं नं थ:पिसं जातिय, वर्गिय, लैंगिक विभेद चीकेगु जक धयावया च्वनागु ख:, जातिय राज्यया माग यानागु हे मदु धयादिल । थुकिं ला वय्क: २०६३ मंसिरया १२ गू बूँदाया सम्झौताय् लिहां वंगु खनेदत, गुगु इलय् थ्वहे जातिय, वर्गिय, क्षेत्रिय लैगिक विभेद चीकेगु कथं राज्य पुनर्संरचना यायेगु खँयात गुगु स्वरुप बीगु धका: गुगुं गृहकार्य मजुनि बलय्या खँ जुल ।
वास्तवय् नेवा: जनतां स्वशासनया माग नं यानाच्वंगु ख: । तर राज्य पुर्नसंरचना व राज्यशक्तिया बाँडफाँड समितिं संघीयताया प्रारुप दयेकू बलय् नेवा: प्रदेश धइगु प्रदेशया नामाकरण व नेवा:त ल्यूने लायेधुंकूगु जूगुलिं न्ह्य:ने हयेत निगू अवधि तक नेवा:त हे मुख्यमन्त्री जुइगु प्रावधान ह:गु ख: । थुकथं निगु अवधितक मुख्य मन्त्री जुइगु खँयात ला नेतातसें तप्यंक हे अस्वीकार यात । अले नेवा:, ताम्सालिङ्ग, तमुवान, लिम्बुवान थुज्व:गु तकं नं मवयेकेत त:धंगु हे षडयन्त्र यात ।
खतुं उगु षडयन्त्र स्वयं एमाओवादीया नेतात नं तक्यं वंगु जूसां चुनावी घोषणापत्रय् तंक वहे प्रदेशया नां तया: एमाओवादी चुनाव ल्वा:गु ख: धा:सा औपचारिक निर्णय नं उगु हे कथं जुयाच्वंगु दु ।
आ: संविधानसभाय् राज्य पुनर्संरचना सम्बन्धय् छलफल क्वचाये धुंकुगु दु । आ: थीथी पक्षनाप वार्ता याना: विवादित विषयस प्रस्ताव तयार यायेगु ज्या संवैधानिक संवाद समितिया अध्यक्ष जुयाच्वंम्ह डा. बाबुराम भट्टराईया हे छयनय् ला:गु दु । थ्वहे स्थितिइ एमाओवादीया नेतातसें भाय्हीकूगुलिं अनया दुनेया जनजाति नेतातसें खबरदारी सुरु या:गु दु । तर नेतातसें थीथी पक्षनाप खँ ल्हाइबलय् गुकथं वनीगु ख: ? न्ह्यस: धा:सा ब्वलनाच्वंगु दु । एमाओवादीया हे नेतां धाल – जातिय पहिचान आ: एमाओवादी दुनेया औपचारिक निर्णय जक जुयाच्वंगु दु ।

More Stories Like this