मरु व भिंद्यःत्वालय् हाकु ध्वाँय् ब्वयेकल

नेवाः स्वायत्त राज्य मंकाः संघर्ष समितिया ग्वसालय् जुयाच्वंगु नेवाः प्रदेश जागरण अभियानया झ्वलय् वंगु शनिवाः येँ भिंद्यः त्वालय् त्वाः मुना जुल । मुना लिपा येँ २० वडाया भिंद्यः व मरुत्वालय् ‘पहिचानविरोधी होशियार !’ धइगु प्लेकार्डलिसें तुं हाकुगु ध्वाँय् खायेगु ज्या नं जुल ।
त्वाः मुनाय् न्ववासें संघीय समाजवादी पार्टी नेपालया महासचिव राजेन्द्र श्रेष्ठं पहिचानसहितया संघीयताया निंतिं जनतां संघर्ष यायेमाःगु व संघर्ष यायेगु निंतिं जनता सचेत जुइमाःगु खँ धयादिल । वय्कलं छथ्वः जातिया मनूतय् आर्थिक उन्नति यानाः व्यापारिक केन्द्र चायेकेफुगु व नेवाःतय्गु अवस्था न्हियान्हिथं स्यनावनाच्वंगुया मू हुनि धइगु वास्तवय् राज्य सत्ताया बः हे खः, थ्व खँ नेवाःतसें थुइकेमाःगु खँय् बः बियादिल ।

वय्कलं धयादिल – 'म्हिगः पहिचान पक्षधरतय्गु बहुमत दुगु इलय् भोटिङयात धाःसा हिबाः वइ धकाः धाःपिसं हे आः थःपिनिगु बहुमत दुबलय् भोटिङ्ग यानाः जूसां संघीयताया मुद्दा क्वचायेकेगु खँ ल्हाना जूगु दु, अथे जूगुलिं संविधानसभा दुनेया पहिचान पक्षधरतसें कुर्बानी बियाः नं पहिचान मदुगु संघीयता वयेके बी मज्यू।'

नापं वय्कलं नेवाः आन्दोलन व आदिवासी जनजाति आन्दोलनया इतिहास कायम यानादी धुंकूम्ह पद्मरत्न तुलाधरया नेतृत्वय् आदिवासी जनजातितसें पहिचानसहितया संघीयताया निंतिं तःधंगु आन्दोलन यायेगु तयारी यानाच्वंगु खँ नं कनादिल ।

उगु हे ज्याझ्वलय् न्ववासें नेवाः जागरण मञ्चया मूछ्याञ्जे विजयकृष्ण श्रष्ठं विघटित संविधानसभाया राज्य पुनर्संरचना व राज्यशक्ति बाँडफाँड समितिं तयार याःगु पहिचानया न्यागू आधार व सामथ्र्यया प्यंगू आधारयात सकसिनं स्वीकार याःगु जूसां उगु समितिं प्रस्ताव याःगु प्रदेशया नांयात अस्वीकार यासें भौगोलिक, सांस्कृतिक पहिचानपाखे ब्वाकाः जनतायात झंगः लायेगु षडयन्त्र जुयाच्वंगुलिं उगु षडयन्त्रयात सफल जुइके मबीत आन्दोलन यायेमाःगु खँ न्ह्यथनादिल ।

अथेहे तुं ज्यापु महागुथिया नायः राजभाइ जकःमिं थःपिनि कविता पाठ यानादिसें नेवाःतय्गु अवस्था न्हियान्हिथं स्यनावनाच्वंगु जूगुलिं जागरुक जुयाः नेवाः स्वायत्त राज्यया निंतिं न्ह्याः वनेमाःगु खँय् बः बियादिल ।

सभानायःया थासं न्ववासें नेवाः स्वायत्त राज्य मंकाः संघर्ष समितिया नायः मनरत्न शाक्यं पहिचानविरोधी शक्तितसें पहिचान वयेके मबीत अनेककथंया षडयन्त्र यानाच्वंगु खँ धयादिसें थुकिया झ्वलय् वंगु चुनावय् नेवाः राज्य वल धाःसा व्यापार व्यवसाय मजुइगु, छगू राज्यं मेगु राज्ययात नाकाबन्दी तइगु अनेक हल्ला यानाः पहिचान पक्षधरतय्त बुकेगु ज्या जूगु खँ न्ह्यथनादिल ।

वय्कलं थुकथंया भ्रम न्यंकाः संविधानसभाय् पहिचान पक्षधरतय्त कमजोर यायेगु ज्या याःगु खँ कुलादिसें थुकथंया भ्रमपाखें मुक्त जुयाः नेवाःत नेवाः स्वायत्त राज्य प्राप्तिया दिशाय् न्ह्याः वनेमाःगु खँ कनादिल ।
येँ २० वडाया स्थानीय बासिन्दात दुथ्याःगु उगु मुँज्या नेवाः प्रदेश जागरण अभियानया झ्वलय् निक्वःगु त्वाः मुना खः । थ्व झ्वलय् ११ म्ह दुगु नेवाः स्वायत्त राज्य २० वडा समिति नीस्वनेगु नं ज्या जुल । थुगु समितिं आः योजना दयेकाः नेवाः प्रदेशया प्रचार प्रसार यायेगु निंतिं आन्दोलनया वातावरण तयार यायेगु ज्या याइगु धाःगु दु ।