एक्टर नं जूपिं डाईरेक्टर

विजय रत्न असंबरे
नेपालभाषाया संकिपा ख्यलय् छम्ह ज्वमदुम्ह व्यक्तित्व धइम्ह रामशेखर नक:मि ख: । वय्कया म्हसिकाजक च्वयेगु ख:सां थुलि थासं मगा: । उकिं थन वयक छम्ह डाईरेक्टर जुया नं एक्टर नं ख: धइगु पक्षयात जक कुले । नेपाल टेलिभिजनय् दकले न्हापां पिदंगु नेवा: फिल्म “बाह्र बजे” रामशेखर नक:मिं हे दयेकूगु ख: ।
वय्क:या डाईरेक्शनय् “झोकमनिम्ह”, “न्हिसुतु” थेंज्यागु नेवा: सिरीयल नं पिदंगु दुसा “चकना” नांयागु छगू फिल्मया नं डाईरेक्टर ख: वय्क । अले वयक थ:म्हेसिनं हे डाईरेक्शन या:गु फिल्मय् अभिनय याइम्ह एक्टर नं ख: । थुकथं वयक छम्ह थ्व ख्य:या न्ह्यलुवा ख: । अले वयकया हे पला:ख्वाँय् लिना न्ह्यां वना च्वंपिं ख: मेपिं ।
फिल्मया डाईरेक्टर जुइम्हेसिके छगू फिल्मया दुने दुथ्याइगु सकतां पक्षया ज्ञां दयेमा । अथेधायेवं वहे छम्हेसिनं सकतां पक्षय् ल्हातयेमा धइगु मखु । विशेष याना छम्ह डाईरेक्टरया अभिनय पक्षया ज्ञां झन बांलाक हे दयेमा । छाय्धा:सां अभिनयका माध्यमं हे डाईरेक्टरं थ:गु फिल्म स्वकुमिया न्ह्य:ने न्ह्य:ब्वई । तर अथेजूसां आपा याना डाईरेक्टर थ:हे एक्टर जुया मखु बरु थ:म्हं मेम्ह एक्टरपाखें अप्व: ज्या याकी ।
छम्ह डाईरेक्टरं छगू फिल्म दुनेया दक्व: पात्रय् अभिनय यायेगु सम्भव नं मदु । तर पात्रया माध्यमं थ:गु खँ तयेगु ज्या: धा:सा उम्ह डाईरेक्टरं यानांतुं च्वनि । अले गुलिखे डाईरेक्टरतसें थ:हे नं छम्ह एक्टर जुया नं म्हिता च्वनि । हलिउड, बलिउड, कलिउडय् अज्यागु दसु यक्व हे दु । उखेपाखे मवने । थन नेवा: फिल्म ख्यलय् थ:हे एक्टर जुया च्वंपिं छुंछुं डाईरेक्टरतयेगु बारे चर्चा यायेग यायेगु कुत: याये ।
थन नेवा: फिल्म ख्यलय् थम्हेसियागु डाईरेक्शनय् थ:म्हं नं छगू भुमिकाय् अभिनय याइपिं आपालं दु । “सिलु” व “राजमति” धुंका दिपा कयाच्वंगु नेवा: संकिपा ख्यलय् बुलुहँु खनेदयेक व:गु स्वंगु नेवा: फिल्म धइगु चाण्डालिका, याँमिखा व सुभाय् ख:। थ्वया दथुइ पिदंगु प्यंगु फिल्म धइगु “चरित्र”, “चिपनिप:”, “निपा: ख्वापा”, “न्हिला न्हिला हुँ” ख: । थ्व प्यंगु मध्ये “निपा ख्वा:पा” व “न्हिला न्हिला हुँ”या डाईरेक्टर श्याम कृष्ण श्रेष्ठ ख: । अले थ्व निगुलिं फिल्मय् वयक भाजुं मेन रोलय् अभिनय यानात:गु दु ।
“चरित्र” फिल्मया डाईरेक्टर पवन जोशी ख: । पवन जोशी नं छम्ह बांलाम्ह एक्टर ख: । तर वयक थम्हेसियागु डाईरेक्शनय् सिबें मेपिनिगु फिल्मय् म्हितेगुलि नुग: क्वसाम्ह एक्टर ख: ।
“चाण्डालिका”या डाईरेक्टर मनिष श्रेष्ठं थ:गु फिल्मय् मू भुमिका म्हिता त:गु दुसा “याँमिखा”य् रवि डंगोल नं डाईरेक्टर कम एक्टरया रुपय् खनेदयेक व:गु ख: ।
“सुभाय्” फिल्मय् आर्यम नक:मि नं डाईरेक्टर एक्टरया रुपय् खनेदयेक व:म्ह ख: । थुपिं मध्ये आर्यम नक:मि आपालं फिल्म दयेके धुंकूगु दुसा थम्हेसिनं डाइरेक्शन या:गु फिल्मय् थ: नं म्हिता वयाच्वंगु दु । रवि डंगोलं “याँमिखा” लिपा “कुलांगार”, “व मिसा”, “वल वल फसिक्वा:”या डाईरेक्शन यात । अले दक्व: फिल्मय् थ:हे म्हिता च्वंगु दु ।
नेवा: फिल्म ख्यलय् डाईरेक्टरया रुपय् राज शाक्यया बिस्कं हे म्हसिका दु । अले वय्क भाजु नं थ:गु फिल्मय् थ:हे नं मेन रोलय् म्हितिम्ह डाईरेक्टर एक्टर ख: । विशेष याना नेगेटिभ रोल म्हितेगु वय्क:या विशेषता ख: ।
नेगेटिभ रोलं हे याये न्ह्या:म्ह छम्ह मेम्ह डाईरेक्टर सुरेन्द्र तुलाधर नं ख: । तर “याक म्ह्याय्” व “जिपिं बदमास मखु” फिल्मय् धा:सा वय्क भाजुया सर्पोटिंग रोल ख: ।
“हसना”, “पियाच्वना”, “ए... जि यम्ह” फिल्मया डाईरेक्टर स्वतन्त्र संसार महर्जन ख: । अले थुकी मध्ये निगू फिल्मय् थ:हे मेन हिरो नं जुयाम्हिताच्वंगु दु । छम्ह एक्टरया रुपय् थ:गु पला: क्वातुकेगु तातुना न्ह्या: वनाच्वंम्ह स्वतन्त्र संसार महर्जनया न्हापांगु फिल्म “निफ्व:स्वां” ख: । उकी व छम्ह एक्टर जक ख: । डाइरेक्टर मखु । थ्व फिल्मया डाईरेक्टर ला अमृतमान महर्जन ख: । अले अमृतमान महर्जनं लिपा मतिना, द्वपंमि सु थेंज्या:गु फिल्म व उलिंचा बाखं थुलिंचा थेंज्या:गु सिरीयल नं दयेकल । अले उगु सिरीयलय् मेन रोल नं थ:म्हेसिनं हे म्हितल ।
“मतिनाया कलि” फिल्मया डाइरेक्टर प्रकाशराज मानन्धर ख: । अले थ्व फिल्मय् प्रकाशराज थ:म्हेसिनं नं छगू रोल याना त:गु दु । मेपिं डाइरेक्टरतयेसं थें वयकलं नं थुके नेगेटिभ रोल हे म्हिता त:गु दु । थ्वहे “मतिनाया कलि”या छम्ह हिरो विष्णु सक्वं थम्हं दयेकूगु छगू फिल्म “माया रे रत्न” या डाइरेक्टर कम एक्टरया भाला क्वबिउगु ख:सा लिपा “लय्” दयेकूबले धा:सा डाईरेक्शनया जिम्मा आर्यम नक:मियात बिल । थ: एक्टरजक जुया ज्या: यात ।
अमृतचन्द्र श्रेष्ठ शुरुइ एक्टर जक जुइगु मतितया व:म्ह ख: । लिपा थ:हे डाईरेक्टर नं जुल । एक्टिंगया इच्छा दनिसां वयकलं थौंकन्हे विशेष याना डाईरेक्शनय् अप्व: ध्यान बिया च्वंगु दु ।
अमृतचन्द्रं थेंहेंतुं रामकृष्ण खड्गी नं थम्हेसित डाइरेक्टरया रुपय् न्ह्य:ने हयेगु कुत: याना च्वंगु दु । मखु धइगु ख:सा वयक नं छम्ह धिसिलाम्ह एक्टर ख: । तर “पटाचारा” थेंज्या:गु च्वछाये बहगु फिल्म दयेके धुंका वयक छगू इलय् छगू हे पक्षय् जक ल्हा: तयेगु पक्षय् च्वनाच्वंगु दु ।
रविन्द्र शाही भाजु नं शुरुइ एक्टरया रुपय् खनेदयेक व:म्ह ख: । “झस्का” फिल्मय् वयकलं मेन रोल नं म्हितल । तर लिपा वना “थ:म्हं म्हूगु गा:” थेंज्यागु स्यल्लागु फिल्म डाईरेक्शन यात । अले उकी छगू रोल नं म्हितल । थन थथे डाईरेक्टर थ:हे एक्टर जूपिनिगु बारे च्वयेगु ख:सा बचाधंगु सफु हे तयार जुइ । उकीं थनला अज्यापिं छु छुं संकिपामितय्गु बारे दसु कुलेगु जक कुत: जुयाच्वंगु ख: ।
थ्व कुतलय् त्वफिके मजिउगु छगू नां वासु शाहीया नां ख: । ग्वंग: क्वस:, लुंयाम्ह झंग निसें कया ब्याहा याये म्हां थेंज्या:गु फिल्मया डाईरेक्टर वासु शाही नं थम्हेसिनं दयेकूगु गुलिखे फिल्मय् थ:हे मेन रोलय् म्हितात:गु दु ।
थुकथं डाइरेक्टर जुया नं फिल्मय् म्हितिम्ह मेम्ह छम्ह सुरेश स्थापित नं ख: । थौंकन्हे “फय्गं” सिरीयलय् वयकया नितां ख्य:या प्रतिभा स्वयेदया च्वंगु दु ।
अथेहेतुं थौंकन्हे “बाखंचा” सिरीयलय् थुकथं हे डाईरेक्शन व एक्टिंग नितां याना च्वंम्ह धइम्ह राजु स्यस्य ख:। वयक भाजु “याक: म्ह्याय्” फिल्मया डाईरेक्टर नं ख: । अले उगु फिल्मय् छगू रोल नं यानात:गु दु ।
रत्नकाजी महर्जन लूनिभां दयेकूगु “मुद्दा” नेवा: भाषाया ख्यलय् बिस्कं हे महत्वं जा:गु फिल्मया रुपय् कयात:गु दु । खय्तला वयक भाजुं थ्व फिल्मय् छुं नं रोलय् एक्टिंग याना त:गु मदु । तर वयक नं एक्टिंगपाखे नुग: क्वसाम्ह संकिपामि ख: ।
नेवा: फिल्म ख्यलय् न्हापांम्ह मिसाम्ह डाईरेक्टरया रुपय् थ:गु न्हाय् धस्वाकेत ता:लाम्ह सुनिता राजभण्डारीं आर्यम नक:मिलिसे छुं छुं फिल्मय् मंका निर्देशक जुया ज्या: या:गु दुसा लिपा वना “ट्वेल्भ डेज” नांयागु छगू फिल्म नं दयेकल ।
अथेहेतुं मेम्ह मिसा निर्देशक लुनिभा तुलाधर मय्जुं नं “कर्कश” नांयागु खस नेपाली फिल्मया नापनापं मेगु छगू निगु फिल्मय् नं एक्टिंग याना त:गु दु । तर विशेष याना डकुमेण्ट्री फिल्मय् ल्हा: न्ह्याम्ह लुनिभा मय्जु आ:तक थम्हेसिनं दयेकूगु फिल्मय् थ:म्हेसिनं हे एक्टिंग या:गु धा:सा मदुनि । नेवा: फिल्म ख्यलय् एक्टर जुइन्ह्यापिं डाइरेक्टरत यक्व: हे दु । उकि मध्ये छम्ह रुपिन डंगोल नं ख: ।
रुपिनं जिपिं बदमाश मखु , सेरीव बन्जा लगायत आपालं नेवा: फिल्मय् एक्टर जुया म्हितात:गु दुसा: वयागु डाइरेक्शनय् “मतिनाया स्वां” नांयागु फिल्म पिदने धुंकल । आ: याकन हे “जि यम्ह पासा” पिदने त्यंगु दु ।
।।

More Stories Like this