थौं बुङ्गद्यःया रथ सालिगु

थौं बुङ्गद्यःया रथ जात्रा सालिगु जूगु दु । थौं लगंख्यःया इति त्वालय् तयातःगु बुङ्गद्यः व च्वकाद्यः रथयात थौं न्हिनय्पाखे सालाः यंकाः जावलाख्यः थ्यंकेगु ज्या जुइ । उगु रथ थौं जावलाख्यः थ्यंसा वइगु आइतबाः भोटो क्यनेगु जात्रा न्ह्याइ । उगु रथ थौं छुं जुया जावलाख्यः मथ्यंसा कन्हय् खुन्हु हाकनं सालाः यंकाः जावलाख्यः थ्यंकी व उकिया प्यन्हु खुन्हु भोटो जात्रा क्यनेधुंकाः थुगुसीया नितिं रथ जात्रा क्वचाइ ।

बुङ्गद्यः सालाः यंकेन्ह्यः म्हिगः बहनी नैंक्या कुर्केगु ज्या जूगु खः । नेवाः समुदायया ञवाः जातिया मिजंपाखें जक उगु नैंक्या कुर्केगु परम्परा दु । कुर्कुगु नैंक्या ज्वनेफुम्ह मनू भाग्यमानी जुइ धइगु जनविश्वास दु ।

थौं न्हिनय् सालिगु बुङ्गद्यः जात्रा स्वयेगु नितिं स्वनिगः व जःखःया आपालं मनूतय्गु हूल मुनेगु याइ । थौंया उगु जात्रा क्वचायेकेगु नितिं स्थानीय मनूतय्गु ब्वतिया नापनापं नेपाल रेडक्रस सोसाईटी, नेपाल प्रहरी र सशस्त्र प्रहरी लगायत सुरक्षाकःमिपिनिगु आपालं हूल मुनि । जात्राया इलय् छु नं बांमलाःगु घटना वा ल्वापु मजुइमा धइगु उद्देश्यं सुरक्षाकःमिपिनिगु ब्वति दइगु खः ।

थौं रथयात जावलाख्यः थ्यंकुसा प्यन्हु खुन्हु राष्ट्र प्रमुखया ब्वतिइ भोटो क्यनेगु जात्रा जुइ व उगु दिं नेपाल सरकारपाखें स्वनिगलय् सार्वजनिक बिदाया नं घोषणा जुइ । उगु दिं भोटो क्यनेगु जात्रा क्वचायेधुंकाः बुङ्गद्यःयात बुङ्गय् यंकी ।

थुगुसी बुङ्गद्यःया जात्रा वंगु बैशाख २० गतेनिसें न्ह्याःगु खः । न्हापांगु दिं रथ दयेकातःगु थाय् पूच्वपाखें गाःबहाः, निन्हुया दिं मंगःबजाः, स्वन्हुया दिं लुँहिति भूज्याः क्वचायेकाः गुन्हुया दिं मय्जुपिनिगु जक ब्वतिइ द्यः सालाः याकः मिसा भूज्याः यानाः इति त्वाःया प्यकालँय् द्यः तयातःगु खः । रथया नियमित पुजा गुथि संस्थानं यायेगु याइ । थुगु बुङ्गद्यः जात्रा थुबले हे क्वचाइ धकाः धायेफइगु अवस्था मदु । उकिं थुकियात नेपाःया हे दकले ताःहाकःगु जात्राया रुपय् नं कायेगु याः ।