हिसिदुम्ह हिरोइन आशिष्मा नक:मि

आशिष्मा नक:मि छम्ह नेवा: फिल्मया लोकंह्वा:म्ह हिरोइन ख: । आशिष्माया दकलय् न्हापांगु फिल्मया नां “न्याल्लब्यां” ख: । वयां लिपा आशिष्मां त:गु हे नेवा: फिल्म म्हितल । उकी मध्ये छगू फिल्मया नां “हिसिमदु” ख: । हिसिमदु फिल्मया हिरोइन जूसां आशिष्मा नक:मियात नेवा: फिल्म ख्यलय् छम्ह हिसिदुम्ह हिरोइनया रुपय् कयात:गु दु । वय्क: मय्जुं न्याल्लब्यां धुंका: छसीकथं पपू मदुम्ह झंग:, हिसिमदु, या:हू, ए... जि य:म्ह, मतिना ला अन हे दु, तारेमाम, मू मदुगु जिन्दगीया नापनापं पानबती फिल्मय् पाहाँ भूमिकाय् नं म्हिते धुंकलसा थौंकन्हय् वयागु पला: कलिउड धका: धयात:गु खस नेपाली फिल्मपाखे न्ह्या: वनाच्वंगु दु ।
थौंसिबें झिदँ झिंनिदँति न्ह्यव “न्याल्लब्यां” म्हितूगु इलय् आशिष्मा नक:मिया उमेर झिन्यादँ तिनि दुगु जुयाच्वन । खय्त ला वसिबें न्हापा हे आशिष्मां क्यामेरा फेस धा:सा याये धुंकूगु जुयाच्वन । थ: अबु संगीतकार मनराजा नक:मिया ‘मय्जुया हिसि’ नांयागु म्येचाया ‘मिखाया अजलं’ म्येय् हुलाप्याखंमि जुया: नं म्हितूगु ख: । अले वहे एल्बमया कभरय् आशिष्माया किपा पिदंगु जुयाच्वन । वहे किपा स्वया: आर्यम नक:मि व सबिन शाक्य आशिष्माया छेँय् थ्यन । तर इमिसं किपाय् खंम्ह आशिष्मा ला इमिसं बिचा: या: थें ल्यासेम्ह मखया च्वन । अले इमिसं वयात थ:गु फिल्मय् कायेगु बिचा: हिइकल । वयात मकायेगु हे उह: काल । अले मेम्ह हिरोइन मा: जुल । तर लुइके मफुत । थ्वहे झ्वलय् आर्यम व सबिनया मनय् लुत कि किपाय् ल्यासे खनेदुम्ह मचा संकिपाय् नं ला ल्यासे खनेदयेफु नि । फिल्मया भासं थुकियात हे फोटोजेनिक धका: धाइ । आशिष्मा फोटोजेनिक जुइगु खँय् इपिं ढुक्क जुल । अले वयात “न्याल्लब्यां” फिल्मय् सबिन शाक्यया अपोजिट हिरोइनया रोलय् म्हितकल । फिल्म पिहां वल । सकसिनं ययेकल । आशिष्मायात नं ययेकल । तर आशिष्मा धा:सा मेगु फिल्म म्हितेगु पक्षय् मदु । छाय् ले ?
“छाय्धा:सा दु नि † फिल्मया शुटिंग ई ब्य: मदइगु जुयाच्वन । गबलें चच्छितक नं शुटिंग याना च्वने मालिगु । चिकु धाये मदु । तांन्व: धाये मदु । चिकुगु ला जिं सह याये मफु । चिकुलां हे शुटिंग यायेमा:बले जि आवंलि फिल्म म्हिते हे मखुत धका: मति तयागु ख: ।” उगु इलय् मेगु फिल्म मम्हितेगु उह: का:म्ह आशिष्मां थ:गु खँ थथे स्पष्ट यात अले धाल, “छन्हु ला जित: शुटिंग दु धका: सुथय् हे का: वल । वना । मेकअप याना । शुटिंगय् धा:सा जिगु पा: हे मव: । न्हिच्छि पिया । अय्सां पा: मव: । चान्हय् तिनि पा: वल । अले हे थज्या:गु ज्या नं याइ ला धका: बिचा: वल ।” तर फिल्म पिहां वये धुंका: आपा:सिनं तारिफ या:बले आशिष्मां थ:गु पला: गातिं तये मफुत, बुलुहुं न्ह्याकल ।
अबु मनराजा नक:मि छम्ह संगीतक:मि जूगुलिं इमिगु छेँय् कलाक:मित आपालं व: । आपा:सिनं आशिष्मायात नं खं । अले इमिसं आशिष्माया तारीफ हे याइगु । उलि जक जुया: आशिष्माया मनय् हिरोइन जुइगु खँ लुयाव:गु धा:सा मखु । मचाबलय्या खँ ख: । उगु इलय् त्रिभुवन पार्कय् छगू फिल्मया शुटिंग जुयाच्वंगु खनिं । अन जिमि पाजु बाज्याया छेँ दु । उकिं जिपिं बरोबर अन वना च्वनेगु । अन शुटिंग जुयाच्वंगु जित: नं क्यने यंकल । उकी विजय लामा व कृष्टी के.सीं. ब्वति कयाच्वंगु जुयाच्वन । आशिष्मायात उगु फिल्मया नां ल्व:मन हँ । थ्व च्वमिं स्यूकथं उगु फिल्मया नां ‘चोखो माया’ ख: । व फिल्मया शुटिंगय् ‘चुमेर सुगन्धित फूल’ म्येय् प्याखं हुलाच्वंम्ह कृष्टिया हिसि खना: आशिष्मा तसकं प्रभावित जुल । अले वयागु नुगलय् नं हिरोइन जुइगु बिचा: बुयावल ।
छम्ह मचाया नुगलय् बुया व:गु रहर हे लिपा वना कलाकारिता ख्य:या पुसा जुल । अले नेवा: फिल्मया हिरोइनया रुपय् पला: न्ह्यात । लोकंह्वा:म्ह हिरोइन जुल । तर थौंकन्हय् वयागु पला: कलिउडपाखे ता:लाना च्वंगुलिं याना: नेवा: फिल्म ख्यलं तापाना वन धका: द्वपं बिइपिं नं दु । थुकिया बारे “नेवा: फिल्मं ला जित: थनतक थ्यंका बिल । थनं तापायेगु ला सवाल हे मदु । तर अथे धका: अफर व:गु दक्वं फिल्म म्हितेगु सम्भावना मदु । चा हे नेवा: जुइमा चाहे खस भाय्या हे जुइमा व सम्भव मदु । रोल स्वयेमाल । ई फ्याये माल । टिम बांलायेमाल ।” थ:म्हं नेवा: फिल्म मम्हितागुयात कया: आशिष्मां थथे बिचा: प्वंकल सा थ:यात छु छु अफर व:गु खँ नं कन । “निगू प्यंगू ला स्कृप्ट ब्वनागु नं ख: । छगू फिल्म ला जित: स्कृप्ट बिया वन तर लिपा भिंतुना दिदीयात कया: शुटिंग हे क्वचायेकल । जित: छक्व: खबरतकं मबिउ ।” नेवा: फिल्मय् थ:गु उपस्थितियात कया: आशिष्मां थ:गु नुग: खँ थथे तल ।
आशिष्मा थौंकन्हय् कलिउडय् केशरी, बुद्ध बर्न इन नेपाल, अधकट्टी थेंज्याmगु फिल्मया ज्याय् तक्यनाच्वंगु दुसा वयागु अन्तराल व तोरी लाहुरे रिलिज नं जुइ धुंकल । थुगुसी अनलाइन फिल्मीखबर फिल्म अवार्डय् “बेष्ट डेब्यू अवार्ड २०१४” या सिरपा:या धेंधें बल्लाखय् न्ह्य:ने लानाच्वंम्ह आशिष्मां आकाझाकां नेवा: फिल्म ख्य: त्व:ता: अमेरिकाय् आख: ब्वनेत वंगु ख:सा अनं लिहां वये धुंका: नेवा: फिल्मसिबें कलिउडय् हे अप्व: ज्या यानाच्वंगु दु । अमेरिकाय् वने न्ह्य: आशिष्मां दकलय् लिपा ज्या या:गु फिल्म ‘तारेमाम’ ख:सा अनं लिहां वया: दकलय् न्हापा ज्या या:गु फिल्म खस नेपाली भाय्या ‘सिक्स फिट लाइफ’ ख: ।
अमेरिकाय् वने न्ह्य:या खँ लुमंकेगु झ्वलय् आशिष्मां कन, ‘अबाय्ति जिं ‘तारेमाम’या शुटिंग याना च्वनागु । जिगु भिसा नं कन्फर्म जुल । टिकट नं कन्फर्म जुल । तर शुटिंग धा:सा सिहे मध:नि । अले ला जिगु नुग: भाराभारा हे मिन । जिं ला बांलाक्क ज्या हे याये मफुत । झन् ‘व दाइचां जिमित गय् जक हाय्के य:’ धा:गु म्येया शुटिंग जुया च्वंबलय् ला जिं बांलाक्क ज्या हे यायेमफुत ।’ थ्व म्येया शुटिंग सिधयेका: निन्हु लिपा हे अमेरिकाय् वंम्ह आशिष्मा अमेरिकाय् च्वनाच्वंबलय् थन थ:गु परिवार व थन संकिपा ख्य: तसकं लुमना वइगु जुयाच्वन । खास याना: थ:म्हेसिनं याना च्वनागु थेंज्या:गु ज्याय् मेम्हं नेपालय् च्वना सिरपा कया च्वंगु खनिबलय् उगु थासय् थ:यात हे तया स्वइगु जुयाच्वन ।
थुकथं नेपाल व नेपा:या फिल्म ख्य: लुमंकु लुमंकुं नेपा: लिहां व:म्ह आशिष्मायात वया अबु मनराजाया छम्ह पासा जगदिश्वर थापां थ:गु ‘सिक्स फिट लाइफ’ फिल्मय् म्हितेत इनाप यात । रोल नं विदेशं व:म्ह मिसाया जूगुलिं उगु फिल्म म्हितल । तर व फिल्म धा:सा आ:तक पिमदंनि । अमेरिकाय् वना: यूनिभर्सिटी अफ नर्थ टेक्सासय् हस्पिटालिटी मेनेजमेन्टय् डिप्लोमा यानाव:म्ह आशिष्मा थौंकन्हय् थन छगू कलेजय् बी.ए. ब्वनाच्वंगु दुसा फिल्म ख्यलय् नं दिपा मदिक्क थ:गु पला: न्ह्याका वयाच्वंगु दु ।

More Stories Like this