बाबुरामया वैचारिक प्रस्तावना ‘न्हूगु शक्ति’

एमाओवादी नेता डा. बाबुराम भट्टराई नं ‘न्हूगु शक्ति’या खँपित ह:बलय् उकियात एमाओवादीयात कुचा थलेगु हतकण्डाया निंतिं पित ह:गु राजनीति धका: मनूतसें थुइकल । उकी नं एमाओवादी रुपान्तरण जुया: न्हूगु परिस्थितिया हाथ्यायात सम्बोधन यायेगुकथं न्ह्या:वंसा वनेमाल, मखुसा ब्यागलं हे पार्टी चायेका: जूसां न्हूगु शक्ति दयेकेमाल धइगु खं ला थ्व ला झन् हे बाबुरामया पार्टी राजनीति दुनेया अन्तरसंघर्षया खँकथं मनूतसें काल ।
तर हालय् ‘झिल्को’ प्रकाशनं पिथंगु डा. बाबुराम भट्टराईया ‘नयाँ शक्ति’ धइगु सफू स्वयेबलय् थ्व डा. बाबुराम भट्टराईया वैचारिक प्रस्तावना थें खनेदुगु दु ।
गुगु इलय् विश्वं समाजवाद व साम्यवादया पटन जुल धका: बय्बय् जुयाच्वंगु इलय् एमालेया मदन भण्डारीं जनताको बहुदलीय जनवाद धका: हल । पूँजीवादी खेमाय् विकास जूगु ख:सां बहुलवादी समाज, बहुदलीय प्रतिस्पर्धा, मानव अधिकार, संसदीय प्रणाली इत्यादि मानव जातिया हे उपलब्धि ख: धका: भण्डारीं पूँजीवादी – जनवादी क्रान्ति (न्हूगु जनवाद)य् थुकियात दुथ्याकल । आ: डा. बाबुराम भट्टराई नं थ्वहे पूँजीवादी, उदारवादं व्यक्तियात गुगु महत्व बीगु ख: व सामूहिकताया मान्यता तइगु समाजवादी खेमां थ:गु व्यवस्था अन्तरगत महत्व बीमा:, वहे बीमफया: समाजवाद तना वनाच्वंगु ख: धइगु प्रस्तावना हया: न्हूगु शक्तिया वकालत यानादीगु खनेदु । मदन भण्डारीं सैद्धान्तिक खँयात न्ह्य:ने तल धा:सा बाबुराम भट्टराई नं सैद्धान्तिक खँया आधारय् शक्ति (राजनीति दल, संगठित शक्ति)या वकालत यात ।
डा. भट्टराई नं च्वयादीगु दु – “व्यक्तिया निजत्वया खँय् समाजवादया अपूर्णता खनेदत । मनूतय्गु गुलिखे सार्वभौम, प्राकृतिक, स्वभावजन्य गुणत दइ । चरित्र व विभिन्नता दइ । उकियात क:घाये मफुत । अमूर्त पहलं सकसितं धिप्पासिप्पा याना: छगू हे यायेत स्व:बलय्् नीगूगु शताब्दीया प्रयोग असफल जुल । मेखे निजत्वयात हे सकतां तायेकेगु, व्यक्तिगत स्वार्थयात प्रधानता बीगु समग्र समाजया हितयात सिकं व्यक्तिया लोभजन्य प्रवृत्तियात जक प्रधानता बीगु खं समाजय् भयंकर द्वन्द्व पिथनाबिल । असमानता व विभेदं पिदनीगु द्वन्द्वया व्यवस्थापन नं उकिं यायेमफुत । तत:धंगु विश्वयुद्ध जुल ।”
नेपालय् पूँजीवादी क्रान्ति जुइधुंकूगु संविधान दयेकेगु दच्छि बीतिनिगु अवस्थाय् समाजवाद उन्मुख जुया: न्ह्यायेत थुगु सैद्धान्तिक धरातलय् न्हूगु शक्ति वया: देय्या न्ह्य:ने वयाच्वंगु आर्थिक व सामाजिक क्रान्तिया चुनौतियात सामना याये मा:गु खँ डा. भट्टराई नं न्ह्यथनादीगु दु ।
नेपाली कांग्रेसं नवउदारवादया प्रतिनिधित्व याइगु जूसां बीपीलिपा थुगु दलयाके सिद्धान्तया नामय् छुं मदये धुंकूगु, वामपन्थी खेमाय् एमाले माक्र्सवादी–लेनिनवादी हे मखये धुंकूगु व एमाओवादी जडसूत्रवादी जूगुलिं याना: आ:या देय्या हाथ्यायात सम्बोधन यायेगु ज्याया निंतिं नं न्हूगु शक्ति मा:गु खँ डा. भट्टराईं न्ह्यथनादीगु दु ।
डा. बाबुरामं थुकथं हे न्ह्यथनादीगु दु – नेपा:या सन्दर्भय् नवउदारवादी लोकतन्त्रया गुलिखे पक्षयात झीसं नाला काये हे मा: । गथे कि बहुदलीय प्रतिस्पर्धात्मक प्रणाली, प्रेस स्वतन्त्रता, मानव अधिकार, आवधिक निर्वाचन, विधिया शासनलिसं लोकतन्त्रया सार्वभौम पक्ष । उकिया दुनेया विशिष्ट पक्षयात नं झीसं स्वयेमा:, गन वर्गीय, जातीय क्षेत्रीय लैंगिक विविधता क:घाइगु याना: समाजवेशी समानुपातिक कथंया लोकतन्त्रया ढाँचा विकास यायेमा: । अमूर्त राजनीतिक धेंधें बल्ला जक जुल धा:सा म्हिग: विभेदय् ला:पिं विपन्न पुच:या राज्यसत्ताय् सहभागिता दइमखु । इमिगु स्वामित्व व अपनत्व दइमखु ।

More Stories Like this