थुकथं लुमंकल – संगीतकार राजभाइ बज्राचार्य

गोविन्द ह्यूमत, संगीतकार
राजभाइ दाइ छम्ह तसकं हे क्यातु नुग:म्ह मनू ख: । वय्क: संगीतया खानी ख: । उलि जक मखसें वय्कलं सदां सकसियागु खँ न्यनेगु यानादी । राजभाइ दाइ नं लय् चिनादीगु आपालं म्ये थीथी एल्बमय् पिदंगु दु, तर वय्क:या सोलो एल्मब धा:सा पिमदंनि बलय्या खँ ख:, अबलय् जिं वय्क:यात छगू थ:गु हे एल्बम नं पिकायेमा: धका: धयागु । थ्व खँ धुंका: लिपा नाप ला:बलय् वय्कलं सोलो एल्बम पिकया दिल । अले जित: सुभाय् नं बियादिल । वय्क:या थ्व महानता ख: ।

अमरराज शर्मा, संगीतकार
जिगु संगीतया सहयात्री ख: – राजभाइ बज्राचार्य । संगीतया कालबिल जिगु थुलि दु कि राजभाइलिसे जिं छुं कम्पोज यानाच्वने बलय्, छुं मछिनीबलय्, थम्हं याये मफइबलय् राजभाइ लुमना: राजभाइ स:तेगु । जिं थथे संगीत तयेबलय् थ:त मछिनाच्वंगु यक्व ज्यंके लं । अथेहे राजभाइया संगीत कम्पोज यानाच्वनीबलय् मछिनाच्वनीबलय् जित: स:ती । जिगु संगीतया सहयात्री थौं मन्त । राजभाइ लिसेया जिगु स्वापू खला जिगु छगू हे त्वा: ख: भूबा: व गा:बा: धइगु दुने व पिने जक ख: । तर अथेसां संगीतया स्वापू राजभाइ नाप २८–२९ सालनिसें राजभाइ नाप जुयाच्वनाम्ह ख: जि । तसकं ला व लुसि थें जिपिं जुयाच्वनापिं ख: । वय्क:लिसेया छगू लुमन्ति थन न्ह्यथने । छक्व: हौग: त्वा:पाखें संगीत कम्पिटिशन या:गु ख: । उकी राजभाइं नं ब्वति कायेत वंगु जुयाच्वन तर अन बांमला: धका: हिस्याना हल खनिं । जिथाय् वया: कं वल । जिं म्ये न्यना ‘थौं जित: त्वँ हे मत्वंसां नसाया रंगं त्व:तूगु मखु’ थुगु म्ये लाल धा:म्हसिनं च्वयात:गु ख: । म्ये बांला: ताल, ब्वति का:सां ज्यू धया । जिं हे तबला थाना: जिगु क्वथाय् प्राक्टिस याना । जि तबला बादक मखुगुलिं मेम्ह हे तबला बादक मालेत धया । वय्कलं जित: हे थाकादिल । उगु कम्पिटिशनय् वय्क: सलय् न्हाप लानादिल । तर थ्व धुंका: वय्क: म्ये हालेगुपाखे स्वयां अप्व: संगीत तयेगुपाखे हे न्ह्यचिलादिल । राजभाइ भजनविधा, सुगम संगीतय् थुलि बांलाक्क संगीत पिकया दी कि न्यनेवं हे आनन्द व: ।
जिं गोविन्द चिकंमूया ‘जागृति’ धइगु प्याखं थक्वा: देसय् स्यनाच्वनागु इलय् दथुइ दथुइ नक्कल क्यनेत थक्वा:या हे राम दाइ नं प्याखं स्यनाच्वनादीगु ख: । तर जित: चित्त बुझे मजुया: अनया स्वम्ह प्यम्हसित जिथाय् स:ता: राजभाइयात व म्ये जिं हारविन थाना: हुलाप्याखं स्यंके बिया, बांलाक्क स्यनाबिल । लिपा वय्कलं जिं थक्वाथय् स्यनागु “चिरिमां” नाटक फम्पिइ स्यना: क्यनादिल ।


सुजीव बज्राचार्य, अध्यक्ष, नेवा: जागरण मञ्च
राजभाइ दाइलिसे उलि संगत ला याये मखं । तर छक्व: फम्पिया बज्रयोगिनी वनाबलय् वसपोललिसे नाप लात । म्हसिका जुल । वसपोल नं संगीतय् नुग: क्वसा:म्ह धका: सिल । लिपा छक्व: अन हे फम्पी जूगु छगू ज्याझ्वलय् वसपोलं हार्मोनियम थाना: भजन हाला बिज्या:गु नं न्यना । लिपा छक्व: निक्व: जक हे नाप लात । तर आकाझाकां वसपोलं थ्व संसार त्व:ता बिज्यात धा:गु खा न्यना: नुग: मछिन । अनित्य थ्व संसारे सुं च्वने मदु । वने हे मानी । तर राजभाइ दाइ मत्यवं बिज्यात । झीसं वसपोलया गुण लुमंके हे मा: ।

राज्यलक्ष्मी बज्राचार्य, म्ह्याय्
बाया गुणं हे जिपिं थौं थन तक थ्यन । वसपोलं जिमित न्ह्याबलें ह:पा: बिया बिज्या:गु । तिब: बिया बिज्या:गु आ: वया: तिनि सिल कि वसपोलं सकसितं हे अथेहे ह:पा: व तिब: बिया बिज्याइगु जुयाच्वन । वसपोल भिंचित्त दुम्ह व्यक्तित्व ख: । वसपोलं थ: मस्तय् यायेमा:गु सकतां ज्या क्वचायेका बिज्या:गु दु । निलाति हे न्ह्य: जक किजा सुरेन्द्रया सुजातालिसे इहिपा यानाबिल । अझ छय् छम्हेसिया बन्द्याभिषेक (वरे छुइगु) ज्यातकं क्वचायेका बिज्यात । वसपोल थेंज्या:म्ह अबु दया: जिपिं धन्य जुल ।

अशोक बज्राचार्य, म्ये हालामि
राजभाइ दाइया गुनया न्ह्याक्व तारीफ या:सां मगा: । वसपोल छम्ह ज्व:मदुम्ह प्रतिभा ख: । जिगु सांगितिक यात्राय् राजभाइ दाइया त:धंगु ग्वाहालि दु । वसपोलया लुमन्ति छगू सिरपा कोष नीस्वंगु धा:गु न्यना । थ्व तसकं लसताया खँ ख: । उकें जित: नं छुं योगदान याये मास्ते व: ।

मनराजा नक:मि, संगीतकार
राजभाइ दाइ विनाया जिगु संगीत अपुरो जुल । वय्कलं सदां जित: साथ बिया वयाच्वनादीगु ख: । आ: आकाझाकां त्व:ता वंबलय् जित: सा:प हे थाकुल । वय्कलं न्ह्याबलें सल्लाह बियादी । अले सल्लाह कया नं दी । वय्क: थेंज्या:म्ह मनू आ: गन मा: वनेगु ?

निशा देसार, म्ये हालामि
जि ला मचाबलय् निसें हे म्ये हाला वयाम्ह । अले जित: राजभाइ त:बा: नं उबलेनिसें हे न्ह्याबलें ह:पा: बिया च्वनादीगु ख: । “बुद्धया रश्मी” म्ये हालाबलय् यलय् नागबहालय् गंगाधर बज्राचार्य त:बा:या छेँय् प्राक्टिस यानागु खँ आ:तक जित: लुमंनि । उबले जक मखु न्ह्याबलें नं वय्कलं जित: संगीतया छुं न छुं न्हू खँ स्यनादीगु दु । जिं थीथी म्ये कासाय् छुं छुं सिरपा त्याकागु दु । व दक्वं राजभाइ त:बा:या गुनं हे त्याके खंगु ख: ।

पवन जोशी, निर्देशक
नीदँ–नीन्यादँ ति न्ह्यव राजभाइ दाइ वय्क:या छपु म्येया म्यूजिक भिडियो दयेकेमाल धका: जित: नाप ला: व:गु ख: । तर अबाय्ति व म्येया म्यूजिक भिडियो दयेके मफुत । लिपा तिनि दयेका । न्याला खुला न्ह्यव राजभाइ दाइया छगू एल्बम विमोचन जूबलय् वय्क:लिसे फोटो खिचे याना । व फोटो फेसबुकय् नं तया ।

पवित्र कसा:, म्ये हालामि
राजभाइ दाइलिसे नाप लाये न्हपालिं वय्क:या म्ह्याय् राज्यलक्ष्मी नाप ला:गु ख: । झिन्यादँति न्ह्य:या खँ ख: थ्व । अबाय्ति गुडनाइट एफएमय् नेपालभाषा ज्याझ्व: चले याना च्वनाबले राज्यलक्ष्मी “जि नं म्ये हाले स:” ज्याझ्वलय् ब्वति का:गु ख: । थुकथं म्हसिउम्ह राजभाइ दाई नं जित: न्ह्याबलें पवित्र दाई धका: धाइगु, जिं राजभाई दाइ धका: हे धायेगु । वय्क: सकसितं मान तया: खँ ल्हानादीम्ह मनू ख: ।

सुरेन्द्र तुलाधर, निर्देशक
राजभाइ दाइ नं जिगु ‘ख्वताबजि’ म्हितेगु इच्छा या:गु ख । तर म्हितके मखन । उलि जक मखु यलय् ‘पानवती’या शो यानाबलय् जिं पास बियांतकं कया मदी । टिकट हे न्याना स्वये भ्वछिं वया: स्वये धका: धयादिल । सितिं स्वयेमज्यू धका: धयादिल । तर छु जुया:ख: मस्यू । ‘पानवती’ स्वयेत वय्क: मझा: । आ: गबलें झायादीमखुत धइगु खँ जिगु नुगलय् घा: यानाबिल ।


भृगुराम श्रेष्ठ, नांजा:म्ह संगीतक:मि
राजभाइ मिखाय् त:सां मतीम्ह मनू ख: । बुद्ध संगीतय् तसकं तसकं नुग: क्वसा:म्ह मनू ख: । जि नं ज्ञानमाला भजनय् वनां तुं च्वनेगु उकिं वलिसे त:क्व: नाप लाये दु । फम्पीतकं वना: भजन या: वने नं । राजभाइ मदुगु खँतकं जिं मसिउ । छन्हु यलय् वीरेनकुमार शाक्यया थाय् वनाबलय् वं कना तिनि सिल । उलिज्व:म्ह मनू आकाझाकां मदुगु न्यना जिगु नुग: तसकं मछिन ।


विजयरत्न असंबरे, कजि, नेवा: जागरण संकिपा समिति
वसपोल छम्ह ज्व:मदुम्ह संगीतज्ञ जक मखसेंं कलाकारिताया बहुमुखी प्रतिभा दुम्ह व्यक्तित्व ख: । वसपोलया बारे न्ह्याक्व चर्चा या:सां गाइमखु । थ्व गुण सदां अमर याना तयेया निंतिं वसपोलया जीवनया सकतां पक्षयात मुना: अभिलेखबद्ध यायेमा: । छापाय् व भिजुअलय् अभिलेखबद्ध याना तल धा:सा लिपाया पुस्ताया निंतिं नं प्रेरणाया स्रोत जुइ ।

More Stories Like this