समाजसेवी दिलशोभापाखें सुभाय् देछा

आमाघरया सञ्चालिकालिसें समाजसेवी दिलशोभा श्रेष्ठं थःत ग्वाहालि यानादीपिं सकसितं शनिवाः छगू ज्याझ्वःया दथुइ सुभाय् देछानादीगु दु ।

दिलशोभा श्रेष्ठया न्यायया निंतिं नागरिक समितिया ग्वसालय् जूगु छगू ज्याझ्वःया दथुइ वय्कलं नागरिक न्हिपतिं थःत यौन दुराचारी धकाः ब्यूगु आरोपयात कयाः सकल पक्षं चिउताः प्वंकाः थःप्रति गुगु सहानुभूति व ग्वाहालि यात, वय्कःपिं सकलें सुभाय्या पात्र जूगु लिसें थुगु मुद्दाय् सकलें विजय जूगु बिचाः प्वंकादीगु खः ।
नागरिक न्हिपतिं वंगु जेष्ठ ५ गते यौन दुराचारया बुखँ पुष्टी मजूगु धकाः प्रधान सम्पादकपाखें क्षमा याचना याःगु खः ।

नागरिक समितिपाखें संयोजक सुजीव बज्राचार्यं ज्याझ्वलय् लसकुस यासें यौन दुराचारया मुद्दा क्वचाःगु व पत्रकारिताया इतिहासय् थुगु मखुगु बुखँ सकल पत्रकार जगतयात हे लँपु क्यंगु बिचाः प्वंकादिसें नागरिक न्हिपतिं सार्वजनिक रुपं माफि फ्वने धुंकाः यौन दुराचारया मुद्दा छगू हदतक क्वचाःगु बिचाः तयादीगु खः ।

वय्कलं नागरिक समितिपाखें आःतक याःगु ज्याया विवरण नं उगु ज्याझ्वलय् न्ह्यब्वयादीगु खः ।
ज्याझ्वलय् नागरिक अगुवा मल्ल के. सुन्दरं दिलशोभायात ब्यूगु आरोप व्यक्तिगत मखसे सकल बांलाःगु ज्या याइपिन्त पंगः थनेगु निंतिं ज्या जूगु बिचाः प्वंकुसें नागरिकं माफी फ्वनाः जक मगाः, क्षतिपूर्तितकं बी धकाः आँट यायेमाःगु खँ तयादीगु खः ।

अथेहे पूर्वमहान्यायाधिवक्ता मुक्ति प्रधानं न्यायया पक्षय् जनता दंगुलिं व संगठित रुपं नागरिक पत्रिकां च्वःगु फय्गं बुखँया विरुद्धय् सःतःगुलिं थौं दिलशोभायात न्याय बीके फुगु खँ तयादिसें नागरिकं क्षमा फ्वंसां अझ नं उगु अखबारया विरुद्ध माल धाःसा कानुनी लँ ज्वनाः वनेगु ज्या ल्यं दनिगु बिचाः प्वंकादिल । लिसें वय्कलं नेवाःतय्त म्वाके मबीगु निंतिं थुकथं दिलशोभायात ख्यायेगु कुतः याःगु खँ तयादिसें राज्यबिहीन जातिया स्थिति गथे जुइ धकाः थ्व घटनां क्यंगु बिचाः तयादिल ।

उगु हे ज्याझ्वलय् पूर्वमन्त्री तीर्थराम डंगोलं नागरिक समितिं याःगु ज्यायात च्वछासें नेता, मन्त्रीतय्सं मखु, धात्थें न्याय बी धकाः लगय् जुइ धकाः न्ह्याइपिं व्यक्तितय् महत्व आः थ्व समाजय् अप्वयाच्वंगु बिचाः प्वंकुसें सुं नं पार्टीया नेतां ब्यूगु मखु, खःसा न्यायप्रेमी जनतां ब्यूगु धासें दिलशोभाया विरुद्ध ज्याखँ याइपिन्त अझ नं खबरदारी यानाच्वने मानिगु बिचाः प्वंकादिल ।
अथेहे ज्याझ्वलय् डा. चुन्दा बज्राचार्यं दिलशोभा थें जाःम्ह व्यक्तिं यौन दुराचारी ज्या यायेफइमखु धकाः न्हापांनिसें थःम्हेसिनं धयावयाच्वनागु धासें दिलशोभाया थुगु आरोपं मुक्त जूगुलिं भिंतुना देछानादिल ।

दरवार ब्याङ्क्वेटय् जूगु ज्याझ्वः कालिमाटी भ्वाइसया प्रमुख मुकेश ज्यापुं न्ह्याकादीगु खः ।