बौद्ध बाखनं नेवा: प्याखनय् व:म्ह मेलिना मानन्धर

मेलिना मानन्धर नेपा:या फिल्म ख्य:याम्ह छम्ह तसकं हे लोकंह्वा:म्ह हिरोइन ख: । वि.सं. २०५० सालय् पिदंगु खस नेपाली फिल्म ‘प्रेयसी’या लुखां नेपा:या फिल्म ख्यलय् थ:गु पला: न्ह्याकूम्ह मेलिना मानन्धर मय्जुं थ्यंमथ्यं न्यय्गू ति खस नेपाली फिल्मय् हिरोइन जुया: म्हिते धुंकल । थुकथं छम्ह लोकंह्वा:म्ह हिरोइन जुइत ता:ला:म्ह मेलिना मानन्धरया पला: नेवा: फिल्मपाखे न्ह्या:गु उलि मदुनि । न्यादँ ति जक दत ।
वय्क: मय्जुया न्हापांगु नेवा: फिल्म ‘पटाचारा’ ख: । खय्तला वय्क: मय्जुयात थौंसिबें नीदँति न्ह्य: दयेकूगु नेवा: फिल्म ‘राजमति’ म्हितेत इनाप या:गु हे ख: । तर मम्हितू । अबाय् ति लाखे वय्क:यात नेवा: भाय् ल्हाये फइगु आँट हे मदु हँ । मखु धइगु ख:सा नेपा: देय्या छम्ह तसकं लोकंह्वा:म्ह लोकपात्रया रुपय् कयात:म्ह राजमति जुइत म्हा: मधाइगु खनिं । तर न्ह्यागु हे जूसां थौंकन्हय् वय्क: मय्जुया नुग: नेवा: फिल्मपाखे क्वसाना वयाच्वंगु दु ।
वय्क:यात आ:तक नं लुमंनि ‘पटाचारा’या न्हापांगु न्हिया शुटिङ्गया खँ । यलया नेवा: छेँय् जूगु जुयाच्वन खनिं शुटिङ्ग । निर्देशक रामकृष्ण खड्गीं मेलिना व मेलिनाया पासा जुया: म्हितूपिं सुनिता राजभण्डारी व रञ्जिता बज्राचार्यलगायतया पासापिं दथुया सिन शुटिङ्ग या:गु जुयाच्वन । ‘पटाचारा’ म्हितूगु इलय् वय्क:मय्जुयात व रोल छगू हाथ्यां जा:गु (च्यालेन्जिङ्ग) रोल जूगुलिं म्हिते मास्ती व:गु जुया: । छेँय् स्कूलय् गबलें नेवा: भाय् ल्हाये मनंम्ह मेलिना मानन्धरयात शुरु शुरुइ नेवा: भासं डाइलग न्ववाये थाकुल । तर लिपा वना: अ:पुया वल । ‘पटाचारा’ वय्क: मय्जुं या:गु धिसिला:गु अभिनयया निंतिं वय्क:मय्जुयात छगू राष्ट्रिय चलचित्र पुरस्कार ज्याझ्वलय् ‘बेष्ट एक्ट्ेरस’या सिरपा:तकं वल । ‘पटाचारा’यात थ्व सिरपा: ब्यूगु हे ज्याझ्वलय् सिनगू सालया राष्ट्रिय चलचित्र पुरस्कार छक्वलं इनेज्या जूगु ख: । अले छगू संजोग हे धायेमालि कि मेगु सालया राष्ट्रिय चलचित्र सिरपा: नं मेलिना मानन्धरमय्जुं हे त्याकादिल । व नं नेवा: फिल्म पाखें हे । वय्क: मय्जुं निगूगु राष्ट्रिय चलचित्र पुरस्कार त्याकादीगु संकिपा ‘बांला: मय्जु’ ख: । थ्व फिल्मया निर्देशक पवन जोशी ख: । तर सिरपा: ज्याझ्वलय् मेलिना थ: हे उपस्थित जुइ धा:सा मफुत । छाय्धा:सां उगु इलय् वय्क: मय्जु नकतिनि जक मां जूगु जुयाच्वन ।
मेलिना मय्जुया जहान मुकेश ढकाल नं छम्ह अभिनेता ख: । वय्क:पिं दथुइ थ्वहे ख्यलय् य:त्य: जुल । इहिपा नं जुल । अले वय्क:पिं सुखी त्यपु जीवन हनावयाच्वंगु दु । ‘वय्क: तसकं भिंम्ह मिजं ख: । जिमि दथुइ सकतां खँ ब्या: । उकें अज्या:गु छुं नं मचा: मछिं मदु । जित: ला वय्क: थें ज्या:म्ह जहान दुगुलिं तसकं लसता व: ।’ थ: जहान मुकेश ढकालया बारे मेलिना मयजुं धा:गु खँ ख: थ्व ।
पटाचारा व बांला: मय्जु निगू नेवा: फिल्म म्हिते धुंकूम्ह मेलिना मानन्धरयात निगुलिं फिल्मं छगू न्हूगु दर्जा बिल । छगू मेगु भाय्या फिल्म ख्यलय् म्हसिका बिल । जब कि थ्व भाय् वय्क:मय्जुया मातृभाषा हे ख: । ‘जिमिगु छेँ क्षेत्रपाटीं क्वय् । अन नेवा:त उलि मदु । दुपिसं नेवा: भाय् मल्हा: । स्कूलय् नं अथेहे जुल । अथे जुया: नं नेवा: भाय् बांलाक्क ल्हाय् मस:गु ख: ।’ धका: थ:म्हं गथे जुया: नेवा: भाय् ल्हाये मस:गु खँ मेलिनां कन ।
मचा बले फिल्म म्हिते धइगु मन दुम्ह ला मखु तर अय्सां थ: याक:बाक: लाइबलय् प्याखं ल्हुइ न्ह्या: । मेलिनां प्याखं ल्हूगु वया पासा पुष्पा लामां खन । पासाम्हं वयात थ: डान्स टिचरयाथाय् यंकाबिल । डान्सटिचरलिसे मेलिनां डान्स स्यना कायेगु उह: काल । मेलिनायात वया पासां यंकूम्ह डान्स टिचरया नां श्रीहरि श्रेष्ठ ख: । सोझाचाम्ह हिसिचादुम्ह मेलिनायात श्रीहरीं नेपा:या नांजा:म्ह नृत्य निर्देशक बसन्त श्रेष्ठ नाप लाका बिल । बसन्त श्रेष्ठं वयात भूवन केसीं दयेकाच्वंगु ‘सपना’ फिल्मया छपु म्ये ‘सुन्दरीको मनमा बस्ने को होला ?’या ग्रुप डान्सर प्याखं ल्हुइकेत यंकल । खय्तला मेलिनायात न्हापा छक्व: भुवन केसीं ‘सपना’य् हिरोइन हे जुइगु अफर ब्यूगु जुयाच्वन । तर मेलिनां इन्कार यात खनिं । तर संजोग हे धायेमालि कि व हे फिल्मया छपु म्येय् प्याखं हुले माल मेलिनायात ।
“सुन्दरीको मनमा बस्ने को होला ?” म्ये तसकं लोकंह्लात । उकी कृष्टी मैनालीं पाहाँ कलाकार कथं छपु आइटम म्येय् प्याखं हूगु ख: । म्येया शुटिङ्गया इलय् जि तसकं डिसिप्लीनय् च्वनेगु । जिगु डिसिप्लीन खना: बसन्त श्रेष्ठ खुसि जुयादिल । अले वय्कलं जिगु नांया सिफारिश निर्देशक दीपक रायमाझीयात यानादिल । अले दीपक डाइरेक्टर साबं छगू फोटो शेसन याकादिल ।
फोटो स्वये धुंका: जित: “प्रेयसी”या निंतिं सेलेक्ट यानादिल । ” थ:म्हेसिनं यानागु न्हापांगु फिल्म गुकथं चूलात धइगु खँय् मेलिनां थुकथं स्पष्ट यानादिल ।
“प्रेयसी” धुंका: लिफ: मस्वसे थ:गु पला: न्ह्याकूम्ह मेलिना मानन्धर थौं वया: नेपा:या नांजा:म्ह कलाकारकथं न्ह्य:ने लानाच्वंगु दु । मेलिनाया आ: याकनं पिलू वइगु फिल्मय् कृषा गौतमी व धम्मवतिया नां न्ह्य:ने लानाच्वंगु दु । बौद्ध धर्मया प्रचारय् थ:गु जीवन पाना बिज्या:म्ह भिक्षुणी श्रद्धेय धम्मवति गुरुमांया जीवनय् दयेकूगु फिल्म म्हिते दया: थ:यात तसकं त:धंगु गौरव प्राप्त जुल धका: धा:म्ह मेलिनां, “शुटिङ्गया इलय् वय्क: स्वास्थ्य उपचारया झ्वलय् जूगुलिं नाप लाये मखं । तर शुटिङ्ग क्वचायेके धुंका: नाप ला: वना । वय्कलं आशिष बिया बिज्यात ।” धका: नं कन ।
‘धम्मवति’ फिल्म नेपालभाषा व खस नेपाली भासं नं पिदनीगु खँ मेलिनां कनेगु ल्व:ममंकू ।

More Stories Like this